Qezaya Pazarî ya Rîze de bi pirrkerdişê behrî rasteyê teyarayan yeno viraştiş û heto bîn ra zî dewanê Pazarî ra Subaşi, Hîsarli û Sîvrîkale de zî ocaxê kerrayî yenî awankerdiş. Vera rasteyê teyarayan û ocaxanê kerrayî de reaksîyonê pawitoxanê cuye dewam keno.
Çend rojî verê Walîtîya Rîze babete sero qerarê ‘seba viraştişê rasteyê teyarayan û ocaxê kerrayî lazimî bi raporê ÇEDî çin a’ girewtbî. Vera nê qerarî de pawitoxê cuye doze akerdî. Labelê şîrket hîna paweyê netîceyê mehkeme nêvindet û dest bi xebatan kerd. Babete ser o pawitoxê cuye qisey kerdî.
Yurdanur Karacaye va ‘ma vera warê cuye de viraştişê çîyanê winasîyan de yî’ û wina domnaye: “Warê tebîîyî ke vînî benî, çîyêk nêşêno cayê înan pirr bikero. Seba ke malîyetê kiriştişê kerrayî kêmî bikerî, tebîetî texrîb kenî. Seba rantê şîrketan tebîet yeno texrîbkerdiş û ma nêyî qebul nêkenî.”
Çira ma ra pers nêkenî?
Sanîye Bîrbena ke 65 serrî yo ke dewa Haçapîtî de cuyena zî wina va: “Ma verê ra nê cayan de cuyenî û ma ocaxê kerrayî nêwazenî. Eke nê cayan çinî bikerî, cayêko bîn çin o ke ma şêrî. Ê nêşênî dewa ma de heme çî bikerî. Ma nêwazenî. Çira fikrê ma nêpersenî?”
Dewijan ra Fatma Pîrîme zî va ‘ganî şîrketî êdî na herême ra şêrî’ û wina domnaye: “Ma do seba tornanê xo xover bidî. Ma nêzanî ke se bikerî. Avûkatî va do demêko derg dewam bikero. Eke çîyêk bêro sereyê ma, ma do muracatê kura bikerî. Ti kes nê ocaxan nêwazeno.”
Heto bîn ra ame îdîakerdiş, rasteyê teyarayan ke 2019 de qedîyayîşê ci yeno hedefkerdiş, seba teyarayanê NATOyî yeno viraştiş. Pawitoxê cuye babete sero do aşma tebaxe de îzehet bidî çapemenîye.
EVRÎM KEPENEK/ŞÛJIN/RÎZE