Zîyaretkerdişê Serekê Dîyanetê Alî Erbaşî çend rojî verê Cemxaneyê Tuncelî zîyaret kerdbî û Erbaşî zîyaretî ra dima dîyar kerdbi ke seba musnayîşê Qurenî wa îmamî tayînê cemxaneyan bibî. Zîyaret û vatişê Erbaşî ver her ke şono reaksîyonî zêde benî.
Babete ser o Pîranê Ocaxê Dervîş Cemalî ra Pîr Riza Yagmurî reaksîyon nîşan da. Pîr Yagmurî dîyar kerd ke ganî şarê Dêrsimî nêşêro cemxaneyo ke karê xo îqtîdarî reyde esto. Yagmurî va ‘Nizdîyê se serrî yo ke Komare esta, labelê nameyê elewîyan çin o’ û wina dewam kerd: “Ewro Dîyanet şono cemxaneyêk zîyaret keno û no tesaduf nîyo. Taktîkê AKPyî no yo û hertim wina keno. No anane Muavîye ra nata 1400 serrî yo dewam keno.”
Yagmurî dewamê qiseykerdişê xo de wina va: “Elewîyî rayîrê xo Muavîye ra aqitnayî û cemxaneyan de înan rê lanet yeno wendene. Ma her cemî de neheqîyan rê lanet wanenî. Ma do hertim hetê heqî de bibî. Seba ke merdim bikewo cemxane, ganî merdim bibo talîp. Gelo Serekê Dîyanetî talîbê kamî yo. Gelo o pîr, raşta zî pîr o? Mîyanê 50 serranê peyênan de têkilîya mabênê pîr û talîban de qerfîyaya.”
PÎRHA / AMED