Erdê Kurdistanî de her ke şer kûr beno koçî zî zêde benî. Merdim ti cayan de nêeşkeno sey erdê xo azade bicuyo. Keyeyê Zîn Samuraye zî vera hêrişanê çeteyê DAIŞî koçê Kobanê, Riha û Amed kerdî.
Gerîlaya YJA Starî Zîn Samuraye ke Heleb de ameya dinya qala tewrbîyayîşê xo yê gerîla û şerê kurdan kerde.
PKK hêvîya şaran o
Zîn Samuraye qiseykerdişê xo de wina va: “Ez cuya gerîllayan ra zaf tesîr bîya. Têkoşînê tevgerê kurd hêvî dano heme şaran. Gerîlayî vera dewleta tirk û zîhnîyetê lîşin de şerêko tarîxî kenî. Gerîla tena seba şarê kurd û şarê Rojhilato Mîyanên ney seba heme şaranê dinya şerê azadî kenî.”
Nêameyo dîyayîş
Zîn Samuraye qiseykerdişê xo yê peyênan de zî qala embazîya gerîlayan kerde û wina qedênaye: “Embazî mîyanê PKKyî de çîyêko zaf bi erj a. Tîya de merdim xo ra ver embazê xo fikiryeno. Cinîyî her ca de yenê pelçiqnayîş. La tîya de wina nîyo. PKK şorişê cinîyan o. Fikrê Rayber Apoyî Rojawan de kewt dewre û şorişê cinîyan virazîya. Rayîrê xelisnayîşê heme cinîyan PKK ra vîyareno. Ganî cinîyî dormeyê tevgerê azadî de bibî yew. Badê ke ez tewrê PKKyî bîya, mi baş fam kerde ke kurdî tena eşkenê erdê xo ser de azade bicuyî. Azadî cayo ke vînî bibo, ewja de yeno gerayîş. Wa şarê ma yê Rojawanî biagêro erdê xo.”
Z. NERGÎZ BOTAN / ZENDA DÎROK / ANF / BEHDÎNAN