Rayna qeza û şaristanê Kurdistanî amey xirabekerdiş û bi hezaran merdimî amey koçberkerdiş. Vernîya nika no plan sey ‘planê xirabekerdişî’ ameybî şinasekerdiş. Çend roj verê Serekwezîr Ahmet Davutoglu Mêrdîn de bi nameyê ‘pêvînayîşî birayîye’ de planêkî ya bi nameyê ‘Planê Çalakîya Masterî’ ya ke 10 madeyan ra pê yena aşkere kerd. Babete ser o cenîyê endamê Kongreya Cenîyê Azad (KJA) û Kongreya Komelê Demokratîk (KCD) qalî kerdî.

Yenê qiseykerdiş
Endama KJAye Meryem Ozdemîr Ok ciresna ke di serrî verê ravêreyeya çareserî de ser maseye ameynê qalîkerdiş û wina verdewam kerd: “Labelê 7’ê Hezîrane ra dima werte de mase nêmend. Planê Masterî ke qala ci yeno kerdişî de hetê bînî nînî dîyîş û sewbîna hetî sey muxatap yenî gêrayîş. La ger ke hetê bîn zî tede cayê xo nêgirî çareserî mumkin nîyo. Ger ke çareserî hetê sîyasî de nêro viraştiş, hetê ekonomîk û komelkî de zî mumkin nîyo. Tîya de merdim vano gelo meclîsê kombîyayîşî ke behsê înan yenî kerdiş kam tede ca gêno. Her çend ke planî ser o yeno vatiş ke do hetê heremî do tede ca bigirî zî ger ke waştişê heremî nêrî dîyîş û bi no hawa meclîsî bêrî awankerdiş, mumkin nîyo ke çareser bibo û ser bikewo.”

Quwetê rehabhilîteye
Endama KCDe Guldane Kiliç zî Sendromê Stockholmî da vîrî û wina dergeyî da qalîkerdişê xo: “Nê hîsî, çi heyf ke hîsê mexdurê ke dijî ê ke înan mexdur kenî vera hîs kenî yî. Ez vana qey Davutoglu zî nê hîsan kifş kerdo la awayo şaş kifş kerdo. Keso ke hem yew şarî qetil biko, hem bihelîno û hem mexdur biko û badê zî xo sey hêzo rehabîlîteker biveyno, no çîyo ke ecêb o. Çimkî no şar baş zano ke sebebê nê ravêreyeye û mexdurîyetî kam o. Ez Davutogluyî ra tena çîk wazena, wa sîye nêko sewbîna çîk nêwazena.” 

DUYGU EROL

JINHA/AMED