Hêrişê DAIŞî
Îdarekerê dewleta Tirkîya vanê ke, têkilîya ma û DAIŞî çin a. Ez wazena ke ewta de hedîseyî ke bîy û tayê îdeayan ser o vindra.
Çeteyanê DAIŞî, 29’ê teşrîne de, bi erebaya bomba barkerdaya zirxine, hêrişê Berê Murşîtpinarî kerdo. Yewna het ra eynê seatan de, Çeteyanê DAIŞî Embarê (Ofîsê) Mehsûlê Erdî yê Tirkîya û hîrê hetanê Kobanê ra bi çekanê giranan hêrişê Kobanê kerd. Çeteyê DAIŞî, çar seatan mîyan de bêvindertiş hêrişê Kobanê kerdo. La nê seatan de, polîs û leşkerê Tirkîya, nê hêrişê DAIŞî temaşe kerdo.
Zanîngehê Kolombîya de, Enstîtuyê Heqanê Merdiman de, Dîrektorê Programê Înşakerdişî Aşîtî, Davîd L. Phillips çapemenî ra tayê îdeayan se rapor ina (wina) nuseno.
1- Yew Komûtanê DAIŞî 12 Tebaxe 2012 de Washigto Post de vano ke; ”Zafê cengawerê ma Tirkîya ser ra vêrtî. Techîzat û tedarêkê ma zî Tirkîya ser ra ameynê. “
2- Goreyê Kiliçdarogluyî; Esenboga ra bi refaqetê MÎTe bi tiran zaf rayan sîlehe raykerda DAIŞ û sewbîna rêxistinan rê. Yew ray zî nê tirî enê kontrol bîynî la MÎT a Tirkîya nêvîyarda ke kontrole nê tiran bibo. Xora nê tiran de çekî vejîyayî orte.
3- Wezaretê Karê Zerrîyî, yew genelge raykerdo valîyê Hatayî rê. No genelge de vajêno ke, şeyîş û ameyîşê mucahîdan (El Nûsra) de, wa ardimo lojîjtîk bidîyo. Wa perwerdeyî bidîyo nê mucahîdan û tedawîyê înan bibo.
4- Goreyê Daily Mailî mîlîtanê DAIŞî Tirkîya ser ro vêrenê la Tirkîya tedbir nêgêna. Goreyê Kanalê Îngîilîzan SKY Newsî, sîndor de damxa danê pasaportê înan ro. Goreyê BBC Tirkîya ra, bi otobosan DAIŞî rê cîhatçî raybenê. Yew bepirsîyarê Misirî vano ke; “Dewleta Tirkîya malûmat dana çeteyanê DAİŞî”
5- DAIŞ; Adapazar û Stenbol de, kombîyayîşan û perwerdeyîyan organize keno.
6- Komûtanê înan tede, çeteyî DAIŞî, Tirkîya de tedawî veynenê.
7- Goreyê rojnameyê Newyork Tîmesî, Tirkîya DAIŞî ra petro herênena.
8- Goreyê îdeayê nuştoxê Radîkalê Fehîm Taştekînî, Tirkîya DAIŞî ra yew litreyê neftî bi 1,25 TL gêna.
9- Goreyê îdeayê wekîlê BDP Demîr Çelîkî, hêzê tîmanê taybet û DAIŞ pîya ceng kenê.
10- Goreyê Hemserekê Kantona Kobanê Enwer Muslumî, Tirkîya bi tîrenan DAIŞî rê çekan kirişena.
11- Goreyê Ardimkarê Serekdewletê Amerîka, Joseph Robînette Bîdenî, tena merdimî Enqere nê, Riha de zî tayê merdimê AKP hayranê DAIŞî yê.
12- Wekîlê AKP Selîm Yagmûr vano ke; “Baş o ke ti estî DAIŞ. Homa guleyanê to kemî nêko.”
13- Cengîz Çandar zî vano ke; Tirkîya DAIŞ tede, cîhatçîyan rê ebeyey kena.
14- Goreyê weşananê medya Bilal Erdoganî zî DAIŞî reyde kombîyayîş viraşto.
Yew merdime DAIŞî, waştnî ke Edene de û Mersîn de, tam yew qetlîam biko. Goreyê vatişan, no merdimo ke bombeyî vistê bîneyanê HDP ser, birayê ey DAIŞî mîyan de ca girewto. No merdim zaf ray şîyo Sûrîye û ameyo Tirkîya.
Çeteyê DAIŞî Orhan G. yo ke Semsume ra yo. 2’yê hezîran de ameyo Tirkîya. Amed de yew otele de mando. 5 hezîrane de mîtîngê Amedî de, di hebî bombayê dayî teqnayîs. Panc hebî merdimî qetl kerdê û 402 tenê zî bîrîndar kerdê. No merdimê DAIŞî, bêardim tena xo ser amed de nişno nê bombayan biteqno.
Serekkomar vono ke; YPG/YPJ Girê Sipî de tikmenan û ereban qornena. Demografîyê heremê Girê Sipî bedilnenê. Tu bingeyê nê vatişê çin o. Heme kes zano ke, kobanijan hêrişê yewerî nêkerdo. Vera wahşetê DAIŞî, welatê xo pawenî. Kurdî Rojawanî wazenê ke; Rojhilato Mîyanên de yew pergalêko demokratik awan bikê û Rojhilatê Mîyanên de mensûbê heme şaran, dînan û mezheban, heme fikran û bîr û bawerîyan, xo bi azad îfade bikî.
DAIŞî waştnî ke heme Kobanijan qetl biko
Tewr peynî de 5’ê Hezîrana 2015’î de çeteyanê DAIŞî, bi panc erebeyanê bomba barkerdeyan û bi 70 çeteyan hêrişê Kobanê kerd. Çeteyanê DAIŞî, Kobanê de pitik, gede, cinî, extîyar nêvat yewver 233 tenî qetl kerdê. Bi seyan Kobanijî bîrîndar kardê. Ewtade DAIŞî waştnî ke heme Kobanijan qetl biko û newe ra dest bido Kobanê ser. La hesabê înan nêtewişt. YPG/YPJ rayna bi qehremanî û fedayîya xo reyna yew destano tarîxî nuşt û çeteyê DAIŞî Kobanê ra pank kerdê. Goreyê vatişê çeteyê misirijêko ke hêsîr ameyo tewiştiş, no hêriş de rayna zafê çeteyan, bi cebilxene çeteyan sîndorê Tirkîya ra vêrtê û hêrişê Kobanê kerdo. Yew çeteyo ke nameyê ey Ahmed Hasan o ser o nasnameyê Tesîsê Qonaxê Suleyman Şahî vejîyayo.
Rayna ma zaf ray weşananê medya de, sîndorê Tirkîya û Sûrîye ser o têkilîya pêveynayîş û têkilîya leşkeranê Tirkîya û DAIŞî dîy. Şeyîş û ameyîşê înan dîyo. Rayna tewr peynî de, bi çimanê xo dîy ke DAIŞ, sîndorê Sûrîye de vera çimanê leşkeranê Tirkîya de, mayînan dekeno bine erdî.
Tirkîya hinê Tirkîya verêne nîya
Berpirsîyarê hukmatê AKP vanê ke; “Ma esla nê kantonan qebul nêkenî.” Nika zî serekkomar Recep Tayîp Erdogan vano ke; “Ma vakûrê Sûrîye de, esla nêverdanê ke yew dewlete sazbibo. Aseno ke Dewleta Tirkîya Sûrîye de îradeyê kurdan qebel nêkena. La sindordaşeya DAIŞî ra razî ya. Ma rind zanê ke esil taloke DAIŞî ra yeno. Çeteyanê El Nûsrayî Reyhanlî de yew bomba day teqnayîş, no teqnayîş de 52 hemwelatîyanê Tirkîya cuyê xo vînî kerd û 146 hemwelatîyê Tirkîya bîrîndar bîyê. Çeteyanê DAIŞî zaf ray hêrişê Tirkîya kerdo û Tirkîya tehdit kerda. Mesela El Baxdadî, Serekwezîr Erdoganî zî tehdît kerdnî û vatnî ke, “Bê bîatî Xelîfeyê ma bibi. Eke ti nêrî û bîat nêbî, gedeyî ma yenî yaqeyê to zî tewşenî:” Rayna yew temsîlcîyê DAIŞî vat ke; “Eke şima, awka Bendê Ataturkî verranêdê, ma hêrişê Stenbolî kenê.”
Tirkîya wazena ke, mîyanê Kobanê û Efrîn de û sîndorê Sûrîye de mîyanê Cerablûs-Azazî de, yew mintaqaya tamponî awan biko. No semed ra Ordûyê Tirkîya bi çekanê giranan sîndorê Sûrîye de bi ca bîyo. Ma texmên nêkenê ke Ordûyê Tirkîya bidekewo Sûrîye. Çunku Tirkîya hinê Tirkîya verêne nîya. Dinya zî dinya verêne nîya. Yew het ra zî HDP tede yew mûxalefetêko bi hêz esto. Dewleta Tirkîya eke bidekewo Sûrîye, bi linganê xo dekewena çol û bataxê Sûrîye. Dewleta Tirkîya, yewna het ra bi teyeranê cengî, Mintiqaya Medya bombardiman kerda. No têgeyr hem Tirkîya de, hem Sûrîye de hem zî Rojhilatê Mîyanênî de yew qaos vejeno.
MAMOSTE SILÊMAN