Hukimatê AKPe Gurgumî de viraştişê kampê AFADe reyde wazeno elewîyan ser o polîtîkayê qirkerdiş û koçkerdişî bido meşnayîş. Elewîyê ke bawerî û kultirê xo vera 1978 de raştê qirkerdişêko gird ameyî û se ra 80’ê înan koç kerdî, na ray zî bi viraştişê no kampî yewna ray surgin û qirkerdişî reyde rî bî rî yî. Çimkî kesê ke bin nameyê bextwaştoxan de tîya de yenî bi cakerdiş, yeno vatiş ke endamê çeteyî û no zî seba elewîyan talukeyêka gird virazeno.

Elewîyî zî nêzdîyê yew aşmîyo ke dijî viraştişê no kampê xo ver danî. Babete ser o muxtarê taxa Terolarê Cêrin Mehmet Caner qalî kerd. 


Kampanyaya îmzeyî

Caner ciresna ke Tirkîya de bin nameyê bextwaştoxan de kampan de xebatê çeteyan yenî kerdiş û wina verdewam kerd: “Ma derheqê nêwaştişê no kampî de şarê heremî ra îmzeyan kom kerdî û her çend ke ma îmzeyan resnayî cayê eleqedar zî dest pê viraştişê kampe kerdî. Wexto ke viraştişê kampe ame rojdem, ma walîyîye reyde pêvînayîşêk viraşt û ma bertekê xo nîşanê înan da. Walîyîye zî ewil vat; ‘şima zî do viraştişê kampî de ca bigîrî û pê debara xo bikerî’ û viraştişê kampî qebul kerdî. La badê ke bi 25 muxtarê endamê Komeleya Muxtarê Gurgumî û 5 embazan sere da Walîyîya Gurgumî ro û nêwaştişê xo înan ra vat, aye wext walîyîye ma ra vat ke seba kampî 16 noqta ameyî dîyarkerdiş la hîna ca zelal nêbîyo. Heman verpers sey nuşteyî zî ma rê ame dayîş.”


3 hezar û 600 îmze

Caner dergeyîya qalîkerdişê xo de vat ke vat ke ê badê sere dayî walîyîye ro û wina domna: “Heta 25’ê adare ti verpers ma rê nêame dayîş. Ma zî 3 hezar û 600 hebî îmze kom kerd û da walîyîye. Çend rojî ra pey ke ma bi zorîya wekîlan reyde resayî belgeyî, ma dî ke seba kampî heremê ma ameyo weçînayîş û rayna ma bander bîyî ke kesê ke seba kampe heremê ma weçînayî, na bire ma ra nimitî.”


Walî bi xo îtîraf kerd

Caner qalîkerdişê xo de destnîşan kerd ke bi awayo bêhuqiqî cayê merga dewijan bê xeberê dewijan ameyo bedilnayîş û wina vat: “Ma çend ray sere da piro zî bê waştişê ma dest pê viraştişê kampe kerdî û şarî ra zî vatî ke ‘keyayî destur dayî’ û bi no hawa raştîyan nimitî. Badê ma dijî nê doz akerd û wexto ke ma nimitişê belge û bireyan pers kerd, walîyî huzurê pawitox û muxtaran de nimitişê xo îtîraf kerd. Wexto ke ma walî ra vat ke ma do dijî şima doz biakerî, walî zî ma ra vat ke aye çax ma zî dijî şima doz biakerî. Ger ke no kamp tîya de bêro viraştiş aye wext ewleyîya ma nêmanena. Merga ma destê ma ra yena girewtiş. Ma nêzanî kamder rayvist û kamî anî tîya de bi ca kenî. Ma sey keyayan viraştişê kampe nêwazenî.”


HASAN YOLDAŞ/ANF/GURGUM