Mesût Yalavûzo ke leşkeran Licê de tepişt, bi guleyan kerd dirbetin û eşt erazî aşkere kerd ke leşkeran waşt bi îşkence ey bikişê. Dermankerdişê Osman Yalavhuzî zî rameno. No mabên de pîyê Osman Yalavûz zî 5 rojî yo tepişte yo.
Leşkerê Tirk ke Licê de vejyayê operasyonî, 19ê Hezîran de eştî dewa Beşişte yê Lîcê ser û gencê bi nameyê Mesût Yalavûzî tepiştî, destê ci pey ra kerdî kelepçe, erazî de geyrnay û dima ra bi guleyê tifing pîzeyê ci ra kerdî dirbetin. Merdimanê Mesût Yalavûzî ey 20ê Hezîran de çormeyê dew de bi hewayê dirbetin dî û hewadîya nêweşxane. Yalavûz o ke beşa lezgîn yê Nêweşxaneyê Fakulteya Tibî ya Zanîngeha Dîcle de yeno dermankerdiş qisey kerd û da zanayîş ke leşkeran waşt bi îşkence ey bikişê.
Bi kelepçe emelîyat kerdî
Dayîka Mesûtî Raîfê Yalavûze da zanayîş ke lajê aye emelîyatî ra dima tayî ameyo ser xo û aşkere kerdo ke saet 18.30’î de leşkeran waşto bi îşkence ey bikişê. Goreyê vatenanê Mesût Yalavûzî seba ke xo destê leşkeran ra bixelesno o remayo, la bi sebebê no remayişî leşkeran hêrîşê ey kerdo. Dima ra o bi halê xo yê dirbetin remayo.
Raîfê Yalavûze vist vîrî ke lajê ci bi dest û lingê ci kelepçekerdî ameyo emelîyatkerdiş û wina va: “No çî nîno qebulkerdiş. Goreyê zonayîşanê doxtoran, talokeyê merdişî hona esto. Dozgerî pêdîyayîşê bi lajê mi qedexe kerd. Ganî ma nezdî ra bi dermankerdişê ey ra eleqedar bibê.”
Kişta bîn ra lajapê Mesûtî Osman Yalavuz ke leşkeran ey dew de kerd dirbetin û tepişt, roja verî beşa lezgîn ra ame vetiş û wedarîya odeyê serwîsî ya asayî. Çengile Yalavûzî rîwalê îşkence şîkîyayo. Dermankerdişê Yalavûzî rameno.
Pî Yalavûz tepişte yo
No mabên de pîyê Osman Yalavûzî Ramazan Yalavûze zî 5 rojîyo ke tepişte yo. Goreyê zanayîşan pî Yalavûz rîwalê nêweşîya xo, her tim ser xo ra şino û nîno zanayîş ke îfadeyê ci do çiwext bîro girewtiş.
AMED