Kurdî û dostê kurdan sere de Kurdistan û Ewropa de û heme cayanê Kurdistanî de seba weşî, ewleyî û azadîya Rayberê Şarê Kurd Abdullah Ocalanî payan ser de yî. Bitaybetî roja ke derheqê Ocalanî de tayê xeberî ser medyaya komelkî de ameyî parekerdiş ra nata kurd û dostê kurdan nêroniştî û hertim çalakîyan virazenî. 

Çarçewaya nê çalakîyan de ewro do bajarê Amedî Rasteyê Îstasyonî de bi sloganê ‘Do tevrîd vînî bikero, azadî qezenc bikero’ mîtîngêk bêro viraştiş. Babete ser o aktîvîsta TJAye Ayla Akat Ataye qisey kerde. Ataye dîyar kerde ke 18 serrî yo ke kerdişê ecêbî yenî bicaardiş û wina va: “Ocalan hepsîyêko normal nîyo û çîyo ke ewro Îmrali de yenî kerdiş bi huqûq û înfazê normalî reyde nîno îzehkerdiş. Şar ewro bi hawayo cîddî azadîya Ocalanî wazeno.”

Ataye va ‘ewro prosesê derbe ke netîceyê ci de OHAL ameyo awankerdiş zî çaresernêkerdişê problemê kurdî reyde eleqeder o’ û wina dewam kerde: “Ewro hukmat zî zano ke Ocalan hepsîyêko normal nîyo. Çend hewteyî verê medyaya komelkî ser o tayê xeberî ameybî parekerdiş. Birêz Ocalan Rayberê şarî yo. No sifet hetê şarî ra dîyayo ci. Cok ra nê xeberan ver şar etirîyeno û ganî nê etirîyayîşê şarî bêro derbazkerdiş. Ganî heyet yan zî keye şêro Îmrali û pêvînayîş bikero.” 


Cinîyî azadîya Ocalanî wazenî

Ataye dewamê qiseykerdişê xo de wina va: “Cinîyî heta nika seba Ocalanî qet bêveng nêmendî. Ewro ma vanî ‘Do tecrîd vînî bikero û azadî qezenç bikero’. Xora wedarnayîşê tecrîdî gamêka muhîme ya. Labelê esil ganî prosesê dîyalogî biaçarîyo muzakere. Ma do mîtînge bivirazî û vatişê xo vajî. Birêz Ocalan bi serran o ke binê tecrîdêko girankerde de cuyeno. Ewro her 10 merdiman ra 8ê ci fikrê Ocalanî qebul kenî, no çîyêko muhîm o û ganî no biherîkîyo mîtînge.”


Wa herkes vera xo bido mîtînge

Ataye bale ante ser mîtînga ke bêro viraştiş ser û wina va: “Muhîmîya na mîtînge seba mi girde ya. Ma do bi hezaran reyde waştişê xo bîyarî ziwan. Ewro Ewropa ra heta heme dinya bi mîlyonan kesî azadîya Ocalanî wazenî. Projeya Birêz Ocalanî ewro Sûrîye de kewta pratîk. Ewro vera na raştîye de bêveng mendiş do heme hukmatan rê bido vînîkerdiş. Ma cinîyî aqlo sîyasî ra vanî ‘yew çareserî esto û bawerîya ma na çareserîye rê esta. Ma bawer kenî ke do azadî qezenç bikero. Cok ra ma mîtînge virazenî. Wa 7 serreyî ra heta 70 serreyî herkes biherîkîyo warê mîtînge. Ma hêzê xo şarî ra gênî. Ma paweyê herkesî yî ke wa bêrî mîtînge.” n ANF/ AMED