‘Waştişê min o peyên mezelêk o’
Kemal Guno 70 serreyî seba ke cenazeya lajê xo Murat Guno ke netîceyê bombevarnayîşê Newala Çetî ya Dêrsimî de bi 11 DHKCyîyan reyde merdbî, bigîro 82 rojî yo ke Rasteyê Seyîd Rizayî de grevê vêşanî de yo. 11 DHKCyîyan ra cenazeyê 9 kesan hema zî nêdîyayo keyeyê înan. Înan ra 4 cenazeyî goristanê bêkesan de ameyî definkerdiş û aqûbetê 5 cenazeyan de ti malumat çin o.
Her roje hetê xebatkarê weşîye ke bi hawayo zerrîwaştox xebetîyenî ra kontrolê weşîye yê Gunî yeno kerdiş. Goreyê malumatê xebatkaranê weşîye, Gun roj bi roje helîyeno. Heta nika mîyanê 82 rojan de 13 kîlo dayo û dejê ci zêde beno. Reyna çimê Gunî de problemî dest pêkerdî û problemê rakewtişî ey de dest pêkerdo.
Peyser game nêerzena
Gunî qiseykerdişê xo de va ‘ez wazena mezelo ke ez ser o şîna lajê xo bigîra bibo’ û wina domna: “Ez înan ra çîyêk nêwazena. Ez esteyanê lajê xo wazena. Eke înan de şeref û wijdan esto, eke ê zî dayîk û pî yî, wa ma mijûl nêkerî. Ez bimira zî çalakîya xo ra peyser game nêerzena. Tena waştişêkê mi na dinya de esto; wa mezelêkê lajê mi bibo. Lajê mi û ciwananê bînan ser de bombeyanê kîmyasalan varnayî. Nika zî qerar gênî ke esteyan teslîm nêkerî. Ê nêşênî nêyî sey mehne nîşan bidî. Esteyê kesê ke ewja de ameyî kiştiş, dîyar î. Her çiqas ke rêxistinê demokratîke, partîyê sîyasî û temsîlkarê înan waştî walî reyde pêvînayîş bikerî, reyna zî no het de netîceyêk nêgirewtî.”
Erşawenî yewbînan
Ozlem Balkiya ke seba piştîdayîşê Gunî hetê ci de ca gêna, wina va: “Dezgeyî berpirsîyarî erzenî milê yewbînan û bi no hawa prosesî derg kenî. Wexto ke rêxistinê sîvîlî walîyî reyde pêvînayîş kerdî, walîyî înan erşawito hetê serdozgerî. Serdozgerî zî berpirsîyarî eşto walîtî ser. Ti manaya nêyî çin a. Bedenê Kemalî nêşêno hîna zaf deyax bikero. Waştişê Ap Kemalî waştişêko sîyasî nîyo; waştişêko wijdanî yo. Rûmet û huqûqêk yê şerî estî. Îqtîdaro ke hesaban ra hetê dînî de hesas o ra ganî merdim biperso, gelo kamcîn dîn de no esto?”
Balkiye dewamê qiseykerdişê xo de wina va: “Verê cû amebî vatiş ke cenazeyê ke wayîrê înan çin î, goristanê bêkesan de ameyî definkerdiş. Labelê Ap Kemalî zura înan vet. Cenazeyê ke vatbî wayîrê înan çin î, heme zî wayîrê înan estî. Heme keyeyî wazenî ke cenazeya xo bigîrî. Ganî keyeyî têkoşînê xo bidomnî.”
Ez do dest pêbikera
Keynaya Kemal Gunî Beyhan Guna ke hem şona hetê dayîka xo ya nêweş ke Erzîngan de ya û hem zî seba piştîdayîşî yena hetê pîyê xo, wina va: “Eke çîyêk bêro sereyê pîyê mi, ez do bikewa grevê vêşanî.”
Heto bîn ra Kemal Guno ke aşma Nîsane ra nata grev de yo rê goreyê Qanûnanê Qebahatan seba her roje 227 TL ceza yeno birnayîş û heta nika pêro pîya 18 hezar 614 TL cezayê pereyî dîyayo Gunî. Gunî va ‘ti sucê mi çin o, esil suc yê ke cezayî birnenî kenî’.
DÎHABER/DERSIM
