Bi wesîleya virazîyayîşê Festîvala Kultur û Tebîetî ya Muzirî ya 19. Komîteya Organîzekerdişê Festîvale eşkerayîyêk daye û eşkerayî de veng dîya ke tewrê festîvala ke do 25 û 28ê Temmuze de bêra viraştene, bibê.
Komîteye eşkerayî de vato ‘Festîvala Kultur û Tebîetî ya Muzirî bi ravêrteyê xo tarîxkîyî yê vîst serrî reyna vil dana û zîl dana’ û wina dewam kerdo: “Vîst serrî verî sazîyê ma yê ke seba kultur, bawerî û tebîetê Dêrsimî wayîrê qesawetî bîyî, prosesê festîvalan da destpêkerdene û heta ewro ame. Vengkerdişê dewan, çinkerdişê cugehan, talankerdişê tebîetî, barajî, fealîyetê madenkarîye, şewatê daristanan, seyd û çîyanê winayênan ser o rojevî ameyê dîyarkerdene û festîvala ma bi serkewtişî resaya heta ewro.”
Komîteye dewamê eşkerayî de dîyar kerdo ke sazîyî na festîvale de do bi hişmendîya ‘Na dinya ma rê çewî ra mîras nêmende, ma a domananê xo ra girewte’ tê bigêrê û wina domnaye: “Festîvala emserêne ya ke do dêrsimijî û dostê înan tewrê ci bibê, şexsê Nûpelda û Ayazê ke teqayîşê qezaya Pulurî de merdbî de heme domanan rê bêro dîyarîkerdene. Festîvala Kultur û Tebîetî ya Muzirî, cehdê wayîrvejîyayîşê tarîx, kultur, bawerî, ziwan û tebîetê xo yo. Ma veng danê heme dêrsimij û dostanê Dêrsimî ke tewrê festîvala ke do 25 û 28ê Temmuze de bêro viraştene, bibê. Wayîrê Dêrsimî, bawerî, ziwan û kulturê xo bivejîye.”
PÎRHA / DÊRSIM