Hewldayenê derbeya 15ê Tîrmehê ra dima OHAL ame îlankerdiş û bi qerarnameyê hukmê qanûnî her hetî ra hêrişê komelî ame kerdiş û fikrê muxalîfan ser de zextî ameyî kerdiş. Şaredarîyê DBPyî zî nê hêrişan ra para xo girewtî. Tewr peynî Hemserekê Şaredarîya Sûka Girdî yê Amedî Gultan Kişanak û Firat Anli zî hetê polîsan ra ameyî tepiştiş. Babete ser o hemserekê şaredarîyanê DBPyî yê qezayê Amedî qisey kerdî.

 'Na derbe ya'

Hemsereka Şaredarîya Qezaya Amedî Pasûr Şadîye Suer Barane va bi serran o ke şaredarîyanê ma ser de hêriş û zextî estbî û qiseykerdişê xo wina domna: “Nê hêrişî bi tayînkerdişê 28 qayuman resa duştê tewr berze. No proses de embazê ma yo ke rayîrê ci korîdoranê edlîye ra nêvîyart, nêmend. Zaf embazê ma, tepişîyayî, tewqîf bîyî û bi şertê kontrolê edlî serbest veradîyayî. Nînan ra pey ma eşkenî vajî tepiştişê Hemserekê Şaredarîya Sûka Girdî yê Amedî nuqtaya peyên bî. Çimkî Amed zerrîya Kurdistanî ya û bi nê hêrişan wazenî rûmetê şarê kurdî bigîrî binê lingan. Ma veng danî şarê xo ke wa şarê ma rûmet, îrade û hemserekanê xo rê wayîr bivejîyo. Na derbe ya.”

Ewro  têkoşîn biderê’

Hemserekê Şaredarîya Qezaya Amedî Erxenî Ramazan Kartalmişî zî dîyar kerd ke ‘bi qayûmê ke yenî tayînkerdiş, wazenî hêzê partîya ma herême de bişiknî’ û wina dewam kerd: “No mudaxaleyêko cîdî yê sîyasî yo. Her çiqas sedemê huqûqî bêrî nîşandayîş zî no çîyêko huqûqî nîyo. Hemserekê ma ameyî tepiştiş û polîsan dormeyê şaredarîye girewt bin ablûqa. Çimkî yew serrî ra vîşêr o ke hetê Wezaretîya Karê Zerreyî û Sayiştayî ra derheqê şaredarîya ma de cigêrayîşî ameybî destpêkerdiş, hema nê cigêrayîşî domkerdênê, qerarêk winasî ame girewtiş. Wazenî çimê şarê ma bitersnî. Wa şarê ma baş bizano ke ma sey kesê ke ameyî weçînayîş, ma do heta peynî xover bidî. Ma veng danî şarê xo wa şarê ma zî vera zext û zordarîye de têkoşînê xo bidomno. Ganî seba ameyeyî, ma ewro têkoşîn biderê.”

Ma do heta peynî xover bidî

Hemsereka Şaredarîya Qezaya Amedî Licê Rezan Zugurlîye zî bal ant hêrişan ser û wina va:  “Dewlete hem hêrişê şarê kurd û hem zî hêrişê kesê ke ameyî weçînayîş kena. Ewro kesê ke rasteyan de kom benî cewabêk zelal danî zext û zordarîye. Verê 28 şaredarîyanê ma rê qayûmî ameyî tayînkerdiş, nika zî Hemserekê Şaredarîya Bajarê Girdî ya Amedî ameyî tepiştiş. Wazenî bi tepiştişê hemserekan seba tayînkerdişê qayûmî zemîn amade bikerî. Ma şarê xo ra tena yew çîk wazenî; wa şarê ma  îradeya xo rê wayîr bivejyo. Şert û mercî se benî wa bîbî, ma do heta peynî xover bidî.”   


 AMED