Startê kampanya Navendê Kultur yê Cegerxwîn de bi kombîyayişê çapemenî ame dayen.  Serokwekîla Koma HDP Çaglar Demîrel, Hemseroka DBP Sebahat Tûncel, Hemseroka KCD Leyla Guven, Qiseykerdoxa KJA Ayla Akat Ata, hunermend Mizgîn Tahîr, xêlê parlementerê cîya, Meclîsê Mayanê Haştî, sazgehê cenîyan yê Amed ra pîya xêlê kesî hadre bî. Damûstayîna ke hetê Ayla Akat Ata ra amê dayen de hayr ancîya raveyşîyayişê Rojhelatê Mîyanî ser. Ata vist vîrî ke bedelê giran yê herbî cenî danê û aşkere kerd ke rixmê her çî cenî dê vatişê xo bivajê û ravêrê nûmayişan. 


Azadîya Ocalanî çarekerdişê meseleyan o 

Ata aşkere kerd ke sebebê kaosê nikayîn yê Tirkîye qebûlnêkerdişê projeyê Komara Demokratîk o. Ata da zonayen ke rewşê nikayî Tirkîye de raya taritî akerd û wina va: “Îdareyanê xorayirberdişî ke serva çarekerdişî hetê şarî amey îlankerdin, bi qetlîam, rijnayişê sûkan, bi sûcanê herbî cewab ame dayen. Yeno vînayen ke kesê ke waştenanê rewa yê azadî ê şarê kurd bi polîtîkayanê şîdet cewab danê senî dejenere bîyê. Dûştê şarê kurd ramitişê tecrîd û tehdîtî tepiştişê mezgî yo. “

Ata hayr ant serbestîya Rayverê Şarê Kurd Ocalanî ser û da zonayen ke cenî endî fikir kenê ke bi Ocalanî ganî Îmrali de nê şert û mercanê azad de muzakereyî destpa bikerê.  Damûstayîn de vajîya ke eke Ocalan serbest nêbo sîstemê Tirkîye do têkşîyayiş ra nêreyno.  Akat Ata aşkere kerd ke azadîya Ocalanî çarekerdişê pêrokîn meseleyanê Tirkîye ya û wina dewam kerd: “Tecdît û şaşîyeke dûştê Ocalanî do zerar bido têkilîyanê şaranê tirk û kurdî.”


‘Wayîrê Rayverîye vejyena’

Ata da zonayen ke bi şîara ‘Wayîrê Rayverî, hardî, azadî vejena’ kampanyayekê newî danê destpa kerden û vengê ‘Bêrê ma pêro pîya serva sîstemekê azad cepheyê demokrasî ronê û hera bikerê’ da. Ata da zonayen ke bi na qampanya polîtîkayanê goçkerdiş, vengkerdişê sûkan, rojnayiş û welişnayiş, tecrîd û hewldayenanê bêîradekerden ra do cewab bîro dayen.  Ata serva newe ra înşakerdişê sûkanê rijnayî û ronayişê ciwîyayişê newî bi şîyara “Her Warek Welatek” de dawetê înşayê keye, kuçe,  dew û sûkan kerd. 


Nûmayiş û aktivîteyê cîya 

Çarçoveyê kampanyaya ke do 6 aşman biramo de nê aktivîteyî dê bîrê viraşten: 

* Heta 1ê Îlone do her taxekê de kombîyayişê cenîyan û 16 sûkan de panel virazîyo. 

* Bi rayverîna Meclîsê Mayanê Haştî de Stenbol, Amed û Wan de bi şîyara ‘Rayverîye rê Azadî’ nûmayişê meydanê nobetî virazîyê. 

* Aşmanê Îlon û Cotmeng de Êlih, Amed, Wan, Mêrdîn û Stenbol de bi slogana ‘Wayîrê Rayverî, hardî, azadîya xo vejyena’ mitîngê cenîyan virazîyê. 

* Şirnex, Nisêbîn, Sur û Gever de gureyînê newe ra înşa û paştdayen dê bi şîyara “Her Warek Welatek” de bîrê ramiten. 

Kombîyayişê çapemenî bi damûsnayişê sînevîzyonê derheqê Ocalanî de qedîya. Cenîyan bi tilîlî, bi slogananê “Biciwe Serok Apo” , "Bê Serok Ciwîyan nêbeno” û bi çepikan waşten û hîsanê xo ardî ser zon. 


 DÎHA/AMED