Koordînasyonê KJK bi damûstayîneke nuşteyî vengê wayîrvejyayîşê xoverdayîşê grevê veyşanî kerd.
KJK aşkere kerd ke 2017 serrekê mîladî ya û vist vîrî ke quwetê hegemon polîtîkayê krîz û kaosî danê ramiten. Îzahatî de vajîya ke quwetê hegemonîk û serdestîya AKP vera kurdan şerekê dayo destci kerdiş û seba nayî zî pêrokîn îmkanê xo seferber kerdîyo. KJK vist vîrî ke hemverê no şerî de helbet do şar xover bido û dîyar kerd ke AKP mehkûmî vilêşîyayîşî ya.
Polîtîkayê teslîmgirewtişî
Koordînasyonî hayr ant tecrîd û binlinkerdişê heqan yê girotxaneyan ser û wina va: “Zîndanan de polîtîkayê teslîmgirewtişî bi rengekê rêk û pêk yenê ramiten. Xala ke na polîtîka bişikîno, wedarnayîşê tecrîdî yo. Zîhnîyeta dewletparêz ke çinî hesibnena, ciwîyayîşê civakî açarnayo zindaneke akerdî. Bi rayîrê qerarnameyan bi hezaran welatperwerî û demokratî, hetê serdestîya faşîst yê AKP teslîm ameyo girewten. Têkoşînê şarê kurd û qomanê Tirkîye, hemverê qirkerdişa kulturî zey xoverdayîşeke tarîxî geş bena.”
‘Ma dê teqez serbikewê’
KJK herzewbîn hayr ant grevê veyşanî ser û da zonayen ke, xoverdayîşê heqdar û bi rûmet ê tepişteyanê dawa PKK-PAJK ke bi rojano zîndanan de rameno, tewrêke bi mane û şoreşger o û wina dewam kerd: “Zîndanê ke bi zîhnîyetê serdes û dewletperest ameyê ronayen de tepişteyan ra bîatkerdiş û teslîmbîyayîş wazîyeno. Tecrîdê giranî ra pîya, kerdenê teberê mordemî ferzê tepişteyan benê. La senî ke ma vizêr xover da û serkewtî, ma dê meşt zî xover bidê û teqez serbikewê. Nayî ra, eke tepiştey bi îrade û bedenê xo vernîya zext û zilmê zîndanan gênê, o wext ganî zey şarê kurd û pêrokîn şarî, ma çormeyê xoverdayoxan bigîrê, wayîrê xoverdayîşê înan bivejyê. Xanî ma xoverdayîşê înan hona vêşêr berzêr bikerê û têkoşîna serbestî biresnê serkewtişî. Roj roja serkewtiş û serbestîya.”
Koordînasyonê KJK veng da şaran, cinîyan û quwetanê demokratîk ke wayîrê xoverdayîşê grevê veyşanî bivejyê, waştenanê heqdar ê tepişteyan bi vengekê berz bîyarê ziwan û xoverdayîşê înan girdêr bikerê.
BEHDÎNAN