Wazenî Bab de şer kûr bikerî

Îdarekara Asayîşê Helebî Berîvan Ebdoye polîtîkayê Rûsya û Tirkîya yê ser Heleb û Babî û averşîyayîşê neweyî yê ke Heleb de qewimîyenî ser o qisey kerde.Berîvan Ebdoye dîyar kerde ke goreyê peymano ke mabênê Tirkîya û Rûsya de virazîyayo, komê ke dima ra kewtî Heleb, nika pêl bi pêl vejîyenî û wina va: “Rûsya vera Helebî de Bab çimê xo ra veta û her di dewletî Heleb û Bab mîyanê xo de pare kerdî. Amerîka, Tirkîya, Sûrîye û Rûsya mabênê xo de îtîfaq viraştî û no îtîfaq ra dima komî Heleb ra vejîyenî. Goreyê pêkerdişê Rûsya û Tirkîya zî komê çeteyan Heleb ra yenî vetiş û erşawîyenî Bab. Wazenî herêma Bab de şer kûr bikerî.”

Çeteyî pak nêbî

Ebdoye dewamê qiseykerdişê xo de va ‘hîna zî heme komê çeteyan Heleb ra nêameyî vetiş’ û qiseykerdişê xo wina domnaye: “Xeylê komê çeteyan Heleb de estî; nînan ra tayê wazenî Heleb ra bivejyî û tayê zî nêwazenî. Heta nika 5 hezarî birîndarî û komî estî. Nê kesan Heleb ra vejenî û înan erşawenî Îdlib ke destê çeteyanê Cebhet El Nusra de yo. Nika herêmê Hulok, Heyderîye, Şêx Xidir, Şêx Faris, Bustunbaşa û Saxur verê destê çeteyan de bî. Wexto ke DAIŞ kewt ê herêman, yew şewe de 8 hezar kesî koçê herêma Şêx Meqsûdî kerdî. Labelê badê ke ma na herême destê DAIŞî ra girewt, nê kesî reyna agêrayî û nika xo tîya de ewleyî de vînenî. Heta nika keyeyêk daxî tîya ra nêvejîyayo.” 

Herêma fabrîkayan a

Ebdoye va ‘hêrişê vera herêma Şêx Meqsûdî de 27 koman ca girewt û taktîkê heme koman zî yewbînan ra cîya bî’ û wina dewam kerde: “Nika nizdîyê 70-75 hezar merdimî warê pawite de manenî. Zafane herêmê Kelase û Selahaddînî ke bin kontrolê rejîmî de yî ra yenî herêma ma. Şerî ra ver 20-25 hezar merdimî herêma Şêx Meqsûdî de cuyayêne û teberê Şêx Meqsûdî de zî 50 hezar merdimî estbî. Nika ma hewl danî hetkarîya înan bikerî. Dewlete lazimîya înan nêana ca. Herêma Şiqeyfî de nizdîyê 250-260 fabrîkayî estî, labelê teyarayan nê fabrîkayî bombe kerdî. Herêma Eyntel û Bustunbaşa de zafane fabrîkayê peme, la, çîtare, û yê boyaxî yî.”

Ebdoye qeynîya qiseykerdişê xo de wina va: “Tirkîya nê demê peyênan de verê xo dayo Efrîn. Herêma Şêx Îsa de şerêko gird qewimîya, eke Tirkîya herêma Şêx Îsa dagîr bikerdêne, o wext do Til Rifat, Dêr Cimêl û Meryemînî zî dagîr bikerdêne. Dima ra zî do derbazê Efrînî bibîyêne. Cok ra verê xo dayî Bab. Tirkîya waşte ke hêzê xo dekera Ezaz û Marê, labelê çeteyan planê Tirkîya xira kerdî.