HAMDULLAH KESEN / MA/HATAY
Vera dagîrkerdişê Tirkîya yê Idlibî de Temsîlkarê Hatayî yê Partîya Şorişgêrî Tumen Turunç û Hemserekê HDPyî yê Hatayî Kerem Nalbantî zî qisey kerdî û reaksîyon nîşan dayî.
Turunçî va ‘amadekarîya operasyonê Idlibî demêko derg bî ke rojeve de bîye’ û wina dewam kerd: “Tirkîya ferqê bedilîyayîşê dengeyanê Rojhelato Mîyanênî de ya. Labelê heta nika heme hemleyê xo de vînî kerdî. Seba ke îqtîdarê AKPyî zere û teber de vînî kerd, nika hewl dano ser dişmenîya kurdan ra îtîbarê xo newe ra qezenç bikero. Cok ra hewl dano bi gonîye û dagîrkerdişî emrê xo derg bikero. Nika şima Hatay de kamcîn het ra biewnî, cîhadperestî estî. Tarîx de nimuneyê ke vera faşîzmî de ameyî dayîş zaf î. Cok ra ganî merdim ders bivejo. Ganî mekteb, taxe û sewbîna heme cayan de merdim vindetişêko qerardar nîşan bido.”
Şaşîya peyêne dagîrkerdişê Idlib o
Nalbantî zî va ‘operasyonê Idlibî şaşîya peyêne ya Tirkîya yo’ û wina domna: “Roja destpêke ra nata polîtîkayê Tirkîya bi şaşîyan reyde pirr a. Çi heyf ke hukmatê AKPyî hewl dano ameyoxa welatî bifetisno. Eke mudaxaleyê Idlibî bibo, do bedelê ci giran bibo. Na rewşe seba domananê feqîran merg, gonîye û hesir o. Ganî Tirkîya nê polîtîkayan ra fek verabido. Bi operasyonê Idlibî esil hedefê Tirkîya Efrîn o û no çîyêko zaf tehlukeyin o. Nika polîtîkaya teberî ya Tirkîya îflas kerdo.”