Hemserekê Şaredarîya Bajarê Girdî ya Wanî Bekîr Kayayo ke tewqîfbîyaye yo, mîyanê aşmêk de 2 dozan ra 18 serrî cezaya zîndanî girewt. Kayayî 2 rojî verê mehkeme de pawitişê ‘Beno ke ez bi hawayo şexsî mexdur biba. Keyeyê mi, domanê mi, cinîya mi mexdur bibî. Labelê ez zana ke nê mexdurîyetî do bibî bingeyê qezencanê komelkî’ kerdbî.
Avûkatê Kayayî Serekê Baroya Wanî Murat Tîmur û avûkat Sabahattîn Kayayî qisey kerd. Tîmurî va ‘nê dozî bitemamî bi fikrê sîyasî ameyî akerdene’ û wina dewam kerd: “Ti bingeyê nê dozan çin o. Seba ke demêko nizdî de weçînayîşê herêmî yeno viraştene, rewarew di dosyayan ra zî ceza dîyaye Kayayî. No zî nîşan dano ke mehkemekerdiş senî yeno kerdene.”
Avûkat Sabahattîn Kayayî zî va ‘heme xebat û fealîyetê Kayayî suc hesibîyayî’ û wina domna: “Merdim sîyasetmedarêk rê sucê ‘endamê rêxistina sîlehine bîyayene’ bierzo, no bi xo îftîraya tewr girde yo. Çimkî wexto ke merdim nê dozan ra ewnîyeno, vîneno ke tena çalakîyêka şîddetî daxî çin a. Nê kerdişî do tarîx de sey eybê girdî cayê xo bigîrî. Merdim vîneno ke merkezê nê qeraran bi xo Anqara yo. Xora no ge-ge bi hawayo aşkere beno. Cezadîyayîşê Kayayî zî netîceyê nêyî de bîyo.”
MA / WAN