Her çiqas AKP û hetkarê ey nê away sey serkewtişêko bi edalet ramojnê zî heme kesê zanayî baş zanê ke no serkewtişê înan bi neheqî yo. Hetêke ya AKPe bi artêşa polês, esker, medyaya xo, bi xezînaya xo û bi qesr û reîsê xo ya xebata weçînayîşî kerde, heto bîn ya heme menfîetkarê nanpawitoxan, nîjadperestanê mîyanê tirkan û xaînanê mîyanê kurdan bi yew fekêke verê xo da zaliman û pey ro mezlûman kerd.
Ma zanê ke MHPe bi zanebûn verê weçînitoxanê xo da AKPe û mîyanê kurdan de zî ayêke vanê nan vernîya kamî, şeref û azadî de yeno û ayêke teberê xo de hemine bêbawer vînenê û hemverê mezlûman hetkariya zaliman mubah vînenê, AKP ard îqtîdar. Vatîşêke min nîjadperestan rê çinîyo. Xora xozaye înan de neyartîya şaran esta, la kurdanê ke vengê xo da partîya qesrî xo seperna çi? Ayê ke xo sepernenê nanê xo; bawer bikerê heta axa ke şima tira nanê xo wenê birîndare bo û şima vare derman bikerê bi kardan pirodê ko guna ke birîna na axe ra bêro bidûso nanê şima ya.
Û ayê ke xo seperna dîn û teberê xo û hevalbendanê xo de hemine bêbawer vînenê; mekerê xo vîr ra ke tenê Homa dereceyê bi bawerî û bêbaweriya merdimî zano. Teberê Homay de çew nêeşkeno merdimî muhakeme bikero.
Hem eyro roc welatê ma û heme Rochilato Mîyanên de meselaye muslimantî û xeyrîmuslimî çinya, meselaye zalim û mezlûman esta, meselaya ke hetêke qral, serek, desthîlat û Muawîye û Yezîdê nê zemanî wazenê îslamîyetî semedê menfîetê xo bixebetnê û zilmêke bê eman ro şarê mezlûman kenê, hetêke zî şarê ke doza ziwan, nasname û axe xo ya ke Homay înan rê bexş kerda la desthilat û zaliman dest dayo ser kenê ya.
Mîyanê nê çinî yo. Mesela meselaye zalim û mezlûman a û îslamîyeto raşt hetê mezlûman o û hemverê zaliman o. Bi çi awayî beno wa bibo ayê ke paştî bidê zaliman wa bizanê ke îslamîyetî ra çewt konê.
Wexta ma hetê HDPe ra banîrê peynîya weçînayîşê 1’ê Teşrîne ra helbet çîyê ke HDP verê çiman ra derbas bikero zaf ê. Ma zanê serkewtişo ke HDPe hemverê astengî û zordestîya ke AKPe bi artêşa polês û eskeran û medyaya xo, bi hîle, dek û dolabanê xo ey ser de pêk arde zî vist xo dest serkewtişêke qic nîyo, la ancî zî lazim o ke HDP weçînayîşê Hezîrane û Teşrîne bido tê ver û xetayê ke ameyê kerdişî ser de baş vindero.
Lazim o HDP şarê kurdî û heme şaranê bînan rê bieşko bibo verpers. Semedo ke xebata ey xebata waştişê desthilatî nîya, xebata ey xebata serkewtişê mafê merdimahî yê şaran a, semedo ke qiwetê xo desthilatî ra nê, şaran ra gêno lazim o biko mîyanê şaran û şaran dir xo yew bikero. Kewtişê HDPe yê mîyanê şaran serkewtişê ey o, serkewtişê ey yê hemverê zalim û desthilatan serkewtişê şaran, serkewtişê heme şaranê Rochilato Mîyanên o.
Nesrîn NAVDAR