Tirkiye de dolimo virenoke jû siyasetvano kurd bi kamiya xo kuno weçînîtîsê serokkomariye. Kok-mok, asil-mesil niyo. Selahattîn Demîrtaş bi kamiya xo ya zelale bî namzetê HDP yê serokkomariye. Seweta kurdan no hal zaf çiyanê pozîtîf ano. Tabî ke teyna seweta kurdan nê, seweta karkeran, emegdaran, însanê bindestî û kemnetevan namzetiya Selahattîn Demîrtaş zaf mûhîm a. Eke qedr û qiymetê namzetiya Demîrtaş rojavanê dugele de bêro famkerdene, seweta pêro Tirkiye raya ciwiyayîsê neweyî bena ra. Jûye gune rind bizonîme ke mavênê Recep Tayyîp Erdogan û Ekmeleddîn Îhsanoglu de jede ferq çîno. Hurdemena kî rayvanê aynî raye yê. Namzetê HDP Selahattîn Demîrtaş 17ê asma temuze ra hata 20ê asme 4 dugelanê Avrupa de bi şarî ra ame têlewe.

Feteliyayîsê Demîrtaş 17ê asma temuze suka Îsvîçre Basel de dest kerd ci. 18ê asma paytaxtê Fransa Parîs de, 19ê asme suka Almanya Koln de û 20ê asme kî paytaxtê Îngîltere Londra de bi şarî ra ame tehêt û mîtîngan de qesey kerd. Mordemi ke tewrebiyayena şarî yê mîtîngan de niyada, alaqa zaf rind û girse biye. Omid keme ke na alaqa sewqê xo dana sandiqanê weçînîtîs. Eke na alaqa sandiqe de biaso, namzetê HDP Avrupa de namzetê CHP/MHP ra zaferî reyan ceno. Turê xo yê Avrupa de birêz Selahattîn Demîrtaş bi nuneranê aleviya ra kî ame têlewe. Lewê tewrbiyayena serokê pêroyî yê Konfederasyonê Jûyena Aleviyan yê Avrupa Turgut Oker de, serokê Federasyonanê Jûyena Aleviyan yê Hollanda, Almanya, Fransa û Avusturya kî têleweamayîs de ca guret. Gorê mi, en mûhîmê xo kî nunerê genciyê yê nî fedrasyonan kî têleweamayîs de amadeyî bî. Na ziyareta Demîrtaş ra dime serokanê Konfederasyonî, yê federasyonan û nuneranê genciye yê aleviyan beyanatê poşt dayene ardî zon. Namzetê HDP yê serokkomariye rê poşt dayena aleviyan zaf mûhîm û lazim a. Çike bi na game naye ra tepiya kî raya piyagurenayîsê aleviyan û HDP biye ra. Xo dibare bikerî: Ferqê mavênê Îhsanoglu û Erdogan çîno. Hurdemena aynî raye ra sonê û tîra xo erzenê jû gol.
Ez nêwazen bifikrîne ke alevî poşt danê namzetê CHP/MHP Îhsanoglu. Ma no demo kilm de dî ke Îhsanoglu hetê kamî dero. Bi ziyaret kerdena mezela Muhsîn Yazicioglu, Ekmeleddîn Îhsanoglu diyayîsê xo yê siyasî kerd eskera. CHP hora partiya dewlet a. Hata nika tertelê en girsî yê aleviyan na partiye virastî. Partiyanê bînan kî siyasetê partiya dewleta tirkî CHP yê verva aleviyan hata ewro ramit. Alevî seke reyanê xo AKP nêdanê, gune CHP û MHP kî medê!  No Îhsanoglu binê sewqa Demîrel ra vejiya. Demîrel rayverê Kemal Kiliçdaroglu yo. Alevî gune endî partiyanê dewleta qetilkare dima meşerê! Yê nî partiyanê dewlete, Ataturk ra bice hata ewro, bêçika xo gonya aleviyan de esta. Kurdî kî gune endî bêrê xoser, dormê Demîrtaş de bêrê pêser, reyanê xo namzetanê partiyanê na dewleta kolonyalîste Recep Tayyîp Erdogan û Ekmeleddîn Îhsanoglu medê!