Tirkîya de nizdîyê mîlyonêk domanê sûrîyeyijî estî û vera nê domanan dîyena mektebanê îmam xetîban. Çend rojî verê Mudurîya Perwerdeyo Mîllî yê Denîzlî îzhetêk dabî û dîyar kerdbî ke domanê sûrîyeyijî do bierşawyî mektebanê îmam xetîban. Hetta na babete ser o kombxebatêk ame viraştiş. Serekê Egîtîm Senî yê Şûbeya Denîzlî Mehmet Dedeyî derheqê na komxebate de qisey kerd.
Neslêko dîndar resnenî
Dedeyî va ‘ganî perwerdeyê domanan goreyê waştişê doman û keyeyê sûrîyeyijan bêro dayîş’ û wina dewam kerd: “Heme domanan erşawitişê mektebanê îmam xetîban çareserî nîyo. No perwedeyo laîk, demokratîk û ilmî ra dûrî yo. Ma vera nê mekteban de nîyî, labelê Tirkîya de hûmara nê mekteban xeylê zaf a. Bi no hawa hewl danî neslêko dîndar biresnî.”
Wendekarî yenê îstîsmarkerdiş
Dedeyî wina qedêna: “Bi no hawa lazimîya îmam xetîban zêde bena. Nê kerdişî çîyê ke sûrîyeyijî cuyenî ra cîyayêr nîyî. Senî sûrîyeyijî karanê cîya-cîyayan de yenî îstîsmarkerdiş, wendekarê sûrîyeyijî zî polîtîkayanê perwerdeyî de yenî îstîsmarkerdiş.”
DENÎZLÎ