Cenîye ke bin banê kooperatîfan de yenê têhet, her demserrî de karê xo kenê. Bi emegê xo ya hetê aborî ra kî weşîya xo danê ramitene. Nî kooperatîfan ra jûye ke Kooperatîfa Cenîyan yê Ekîn a. Kooperatîfî de asmanê amnanî ra tepîya hadreyînê zimistanî destpa kerdî. Zerrê kooperatîfî de 20 cenî amey têhet.
Cayo ke cenî estê de serkewtiş esto
Avey bosto kerdê husk nika ke karê îsot pîya kenê. Ceniyan ra Medîne Arda ana zon ke Şaredarîya Wêranşar ra pîya wertax gurene. Arda hayr ant emegê cenîyan ser û wina va: “Îsotî ma nayî ro, hêgayê ci ma ramit, hata resayisê ci her ciya ma eleqedar bî. Nika kî kerdime arê serva rotene ke piya kemê hazir. Kotî ke cenî estê uca beno rindek, uca de serkewtene bena.” Arda veng da ceniyan û va; berê piya zerrê kooperatîfî de ca bicerîme.
Cenîya bi nameyê Hedîye Kalkan zî domanê xoyê 9 serre ra pîya tewrê kar bena. Bi vengê xo ya rindeke ke ceniyan rê klaman vana. Hemşaredara Wêranşar Fîlîz Yilmaz kî da zonayene ke gurenayisê ceniyan seba înan zaf muhîm o û va: “Ci rê poşt ke vejîme. Serva ke cenî zerrê homete de xo bivîne, hetê aborî ra ke qûweta xo bibo.” Yilmaz vana taybet ke cenî û wele, cenî û tewrê gure biyayene sero vindeme. Wazeme ke jedena cenî tewrê na kar bibê.
DÎHA/RIHA