Sêwereg ra heta Dersim
Çapemeniya kurd, jû gamêda bîn ya tarîxî eşt û destpa weşana televizyonî kerd. JIYAN TV yo ke nêzdîyê di serrîyo ke satelîtê TURKSATî ser ro bi zarawaya kurdî kurmancî weşan keno vizêr ra tepya destpa weşana kirmanckî kerd. Qenal de Dersim ra heta Sêwereg, Çewlig ra heta Gimgim bernameyî viraziyenê. Herzewbîn studyo de zî bernameyê siyasî ra heta bernameyê ziwanî, xêlê bernameyê ciya estê.
JIYAN TV de termînê weşanî yo newe de her hewte, babêtanê kultir, dîrok, edebîyat, huner, cenî, hunere destan û weşî ser o bernameyî do biweşanîyê. JIYAN TV de kîşta nê bernameyan de ca do bidîyo mîyanê hewteyî de her rojê mabênê saete 08:00-10:00 de bernameyê şewdirî “Vengê Şewdirî” (08:10) yo ke tede qewimîyayîşê roje û manşetê rojnameyan bidîyê, hewte de di rey programê analîzî “Her Het Ra” û her roje pêroj û şan de bultenê vengûvajan.
Serva verîgirotişê çinbiyayen
Îdarekaranê televîzyonî ke derheqê termînê weşanî yê neweyî de melumatî dayî aşkere kerdî ke serva verîgirotişê talokeyê werte ra wedarîyayîşê kirmanckî û raverberdişê ci qerarekê winayîn girotiyo.
JIYAN TV vizêr bi bernameyê ganî ‘Vengê Sewdirî’ destpa weşan kerd. No bername yo ke hetê Sabahattîn Gultetîn yeno pêşkeşkerdin, do zereyê hefte panc rojan de bîro weşînayen. Herzewbîn vizêr derheqê weşana bi kirmanckî û Newroz de weşana taybet ya ganî viraziya. Herzewbîn her roj goreyê seata Amed, 19:30î de bernameyê ‘Ajanse Şanî’ de biyayişê rojî estê.
Sodir ra heta şew weşan esta
Bernameyê Analîz ‘Her Het Ra’ ke Kamer Erdogan pêşkeş keno vizêr seat 20:30î de weşîniya û Parlamenterê HDP yê Dersim Alîcan Onlu tewr bi. No Bername yo ke zey analîzê rojdemî yo, hefte de di reynî (Dişeme-Îne) de weşîniyeno.
Bernameyê ‘Vîr û Ziwan’ ke roja Îne 15:30î de hetê Mûtlû Can viraziyeno û Mihemmed Malmisanij zî meymanê daimî yo de qalê ziwanî yeno kerden. Roja Şeme zî dibareyê ci esto. No bernameyî de derheqê ziwanî de malûmat hu perspektîfê raştîn yeno dayen. Herzewbîn serva raveyberdişê zonê bi Kurdî-Der ra piya ser ‘formê giramerî û standartîzekerdişê ziwanî’ bernameyê ‘Dersê ziwanî’ viraziyeno. JIYAN TV de bernameyanê ‘Vengê Domanan’ ra heta bernameyê ‘Hunerê Destan’, Xoza ra heta weşî û edebîyatî xêlê bernameyê ciya yê renginî estê. Bernameyê JIYAN TV ser malperanê înternet ra zî êşkenê bîrê taqîpkerdin.
Frekansan JIYAN TV wina yo:
Satelîtî: TURKSAT
Frekans: 12422
Polarizasyon: H – Yatay
Sembol: 30000
Fec: 3/4
NAVENDÊ XEBERAN