Kulavo ke xalîyî ra ver zaf ameyêne bikarardene, nika ver bi vînîbîyayîşî de yo. Meslegê kulavkarîye ke vera averşîyayîşê teknolojîyî de xo nêgirewt, êdî demanê xo yê peyênan cuyeno. Qezaya Sêwregi ya Riha ke 300 hezar nufûsê ci esto de verê cû 40-50 westayê kulavî estbî, labelê nika tena westayêk mendo.
Westayo peyên Kadrî Yenîgun dîyar keno seba ke westayê bînan nêşêna debara xo bikerî, dikanê xo padayî û wina dewam keno: “Ma nika seba ke no mesleg vînî nêbo, hewl danî. Nika tena heqê kesêkî vejîyeno. Hetê ekonomî de ti qezencê ma nêmendo.”
Yenîgun dewamê qiseykerdişê xo de wina vano: “Ez nê meslegî pîyê xo ra musaya. Bi averşîyayîşê teknolojîyî, no mesleg zî her ke şi tepîya mend. Verê cû 40-50 hebî dikanî estbî, labelê nika Sêwregi de tena dikanêk mendo. Nika rojane qezencê ma 100-150 TL yo û no mesleg zaf betilneno. Êdî zaf kesî kulav tercih nêkenî. Tena şiwaneyî bikar anî. Êdî wina bîyo ke nan nêvejîyeno. Eke ma zî fek ti ra verabidî, no mesleg vînî beno. Helbûk 4-5 hezar serrî tarîxê nê meslegî esto. Eke merdim 2 şagirtan bido xebetnayene, na reye heqê înan nêvejîyeno. Ti nêşênî qezenç bikerî ke westayan biresnî.”
MA/RIHA