Teşebusê derbe ra dima OHAL ame îlankerdiş û rewşêka îstîsnayî nika dewre de ya. Îlankerdişê OHALî ra dima her hetan ser de hêrişî zêde bîyî û bi deshezaran kesî ameyî tepiştiş û tewqîfkerdiş. Bi taybetî zî wextê tepiştişî de vera cinîyan de îşkenceyê zayendî xeyê zêde bîyo.
Babete ser o Endama Komîsyonê Cinîyan ya Komeleya Heqê Merdiman (ÎHD) ya Amedî Hatîce Demîre qisey kerde.
Demîre va ‘îlankerdişê OHALî ra dima wextê tepiştişî de pelçiqnayîşê heqan û îşkenceyo zayendî xeylê zêde bîyo’ û wina domnaye: “Cinîyî zextan ver gerre nêkenî û raporê ke hetê doktoran ra yenî amadekerdiş, goreyê Protokolê Stenbolî nîyî.”
Demîre dewamê qiseykerdişê xo de va ‘cinîyî wextê tepiştişî de raştê hêrişan yenî û bi hawayo rût raştê sehnayîşî yenî’ û qiseykerdişê xo wina qedênaye: “Cinîyî reyna zî gerre nêkenî. 2 sebebê gerrenêkerdişî estî; ya yewine cinîyî vanî ‘ma xo ewleyîye de hîs nêkenî, eke ma gerre bikerî do nasnameyê ma deşîfre bibo.’ Ya dîyine zî bawerîya înan bi edalet nêmendo. OHAL ra dima tepiştiş û tewqîfkerdişî zêde bîyî û wextê tepiştişî de raştê çîyê xiraban yenî.”
ŞÛJIN /AMED