RUKEN DEMÎR MA/ÎZMÎR Muxabîrê Ajansê Xeberan yê Dîcle (DÎHA) ke bi KHKyî ame padayene, Gokhan Oner 27ê Nîsana 2018î de amebî tepiştene û 4ê Gulane de tewqîf bibi. Onero ke 90 rojî tewqîfbîyaye mend, dima ra 26ê Temmuze de tehlîye bi. Oner çîyê ke wextê tepiştiş û zîndanî de cuyayî ser o qisey kerd. Onerî va ‘wexto ke ma ameyî tepiştiş, odeyê avûkatan yê emnîyetî de bi hawayo zorî endamanê MÎTî reyde pêvînayîşî bi ma dayî kerdene’ û wina domna: “Înan Dîlek Dogane û Dîlan Kortake dayî mi vîr û mi ra vatî ‘ti bi hawayo mucîze cuyenî’. Seba ke mi xeberê Dîleke û Dîlane viraştbî, nameyê mi zî lîsteyê înan de estbî. Kesê ke xo sey endamê MÎTî şinase kerdî, kesê ke ma reyde ameyî tepiştiş ser o ajanîye ferz kerdî. Destekê xebatkaranê çapemenîye azade hêz û moral dayî mi.” Onerî dewamê qiseykerdişê xo de wina va: “Wexto ke ez tewqîf bîya, 4 rojê sifteyînî ez hucreyêko lêmin de menda. Hepsîyanê edlîyan ser o zî zext û îşkence kerdênê. Mektûbê ma nêerşawîyayênê, labelê heqê ci hesabê ma ra ameyêne birnayene. Werdê zîndanî nêbaş bî. Fotograf antişê hepsîyanê sîyasîyan qedexe bi. Zîndan de heme çî qedexe bi labelê tena îmam serbest bi. Tehqîqatê kêfinî ameyênê akerdene. Îdareyê zindanî mergî reyde mi tehdît kerdî. Labelê se beno wa bibo, ez do nuştişê heqîqete bidomna.”