Çarçoveyê operasyonê xelesnayişê sûkanê Rojawa û Sûriye de nika hayr anciya sûka Minbic ser. Meclîsê Eskerî yê Minbic û QSD aşkere kerdbî ke quwetê nînan xelesnayişê sûk ra hadre yê. Hemseroka Meclîsê Rayverîn ê Minbic Sozdar Xalid zî aşkere kerd ke wextê xelesnayişê Minbic çeteyanê DAIŞ ra ame. 

Badê Meclîsê Eskerî yê Minbic, 5ê Nîsan de zî Meclîsê Rayverîn yê Sûk bi perspektîfê “Ma dê Minbic  bikerê sembolê cuwyayişê wertex yê şaran” ame îlankerdiş. Meclîsê Rayverînî de temsîlkaranê kurd, ereb, çerkes û tirkmenan ra 43 kesî ca gênê. 


Minbic paşt da quwetanê demoktarîk

Hemseroka Meclîsê Rayverîn yê Minbic Sozdar Xalid ke Ajansa DÎHA rê qisey kerd, vist vîrî ke badê destpa kerdişê şoreşê Sûriye, Minbic’î serva înşayê Sûriyeya demoktarîk tekoşîn kerd û na ray de xêlê şehîdî da. 

Xalid da zonayen ke sûka Minbic û herema çorme, 21ê Çile 2014î de hetê çeteyanê DAIŞ îşgal bî û wina dewam kerd: “A çax ra na het, rexmê kiştiş, remnayiş û rijnayişê çeteyanê DAIŞ şarê heremî tekoşînê cuwyayiş da. Kerdenê çeteyanê DAIŞ yê şikitişê îradeyê şarî nêresya hedefê xo. Sebebê nay baweriyê cuwyayişê piyayî, baweriyê wa û birabiyîna şaran o. Nayî ra şarê Minbic paşt day quwetê ke vera DAIŞ day piro”.


Cuwyayişê exlaqî û polîtîk

Sozdar Xalid da zonayen ke pêrokîn şarê Minbic amey pêhet û meclîsî îlan kerdî û derheqê armanc û hedefanê meclîsî de wina qisey kerd: “Ma serva înşakerdişê sîstemeke demokratîk yê Sûriye tekoşîndayişî hedef kenê. Mavêna şaran de ma dê prensîbê edaleta civakî û têduştî esas bigîrê, ciyakerdişî nêkerê. Serva herem ra vetişê çeteyanê DAIŞ û ronayişê cuwyana exlaqî û polîtîk ma dê tekoşîn bikerê”. Xalid aşkere kerd ke zereyê hedefanê înan de ser esasê prensîbê wa û birabiyena şaran viraştişê haştî ya miyanî û ronayişê cuwyayişa wertex esta. Gureyînê sereva ageyrayişê şarê ke herem ra goç kerdî zî zereyê hedefanê meclîsî de yo.   

Hemseroka Meclîsê Rayverîn yê Minbic Sozdar Xalid eleqe ant cuwyayişê şaranê Minbic ke bin zilmê çeteyanê DAIŞ de yê ser û wina va: “Hinî wextê xelesnayişê Minbic destê çeteyan ra ame. Nayî ra zey gama sifte Meclîsê Rayverînê Heremê Minbic roniya. Ma dê serva înşayê herem û cuwyayişê demokratîk gureyîn û tekoşînê xo biramnê”.  Xalid veng da şaranê Minbic ke înan het de ca bigîrê û da zonayen ke wezîfeyê xelesnayişê Minbic kewno ser Meclîsê Eskerî yê Minbic. Xalid va, badê xelesnayişê sûk, meclîs zî do sûk de bica bibo. 


Ma hadre yê 

Qiseykerdoxê Meclîsê Eskerî yê Minbic Ebû Emced şaranê herem ra waşt ke înan ra bawer bikerê û paşt bidê. Emced’î da zonayen ke, ê hadre yê ke goreyê qerarê Meclîsê Rayverîn sûk bixelesnê û aşkere kerd ke QSD zî dê derheqê paştdayişê meclîsî aşkerekerdiş bidê û operasyonê xelesnayişê Minbic’î de leyê Meclîsê Eskerî yê Minbic de ca bigîrê. 

 

Cayê stratejîk yê Minbic’î çik o?

Minbic de kurdan ra piya nezdiyê nîme mîlyon şarê ciya piya cuwyenê. Çeteyê DAIŞ heta nika ser Minbic ra ravêrnenê Tirkiye û ewja ra vilayê dinya benê, qetlîaman virazenê. Raya vetişê çeteyan yê xeta Azaz û Cerablûs, xeta Minbic û Bab ra ravêrena. Sosyolojiya Minbic sûkanê bîn ra ciya yo. Minbic teslîmê DAIŞ nêbi, vera îşgalê DAIŞ serewedarna û vera DAIŞ paşt day quwetanê demokratîk. Nayî ra çeteyanê DAIŞ 1700 kesan serva tersnayişî qetil kerd. 

Minbic hetê otorîteyê eşîran yeno îdare kerdiş.Nika temsîlê nê eşîran Meclîsê Demokratîk yê Şaranê Suriye de ca gênê. Navendê Minbic de bi hezaran kurdî cuwyenê. Herzewbîn bi desan dewê kurdan nezdiyê sînorê Cerablûs û Azaz de yê. Badê operasyonê Minbic dor de xeta Bab û Mare esta. Eke nê cayî zî bîrê giroten do raya DAIŞ yê sînorê Tirkiye bîro giroten. Bi nayî ra piya Kobanê ra heta Efrîn do korîdorekê ewle bîro ronayen. Bi xelesnayişê nê cayan ra piya, DAIŞ do Rakka de bîro tengkerdiş û bi hemleyanê newî ewja de zî biqedîyo. Cok ra rejîma Enqera nika ra kewta panîk.  


 DÎHA/KOBANÊ