Hemserokîna Konseya Rayverîn ê KCK damûstayîna xo ya 8ê Kanûne de veng da pêrokîn partî, dezgeh û rêxistinanê Kurd yê Bakûr, Başûr, Rojawa û Rojhilatê Kurdistan û waşt ke seba viraştişê Kongreya Neteweyî yê Kurdistan rolê xo bîyarê ca. Hemserokîna Konseya Rayverîn hayr antbi konjonktorê se serra 21. ser û vistibi vîrî ke letebîyayiş Kurdan rê dano vinîkerdiş. Damûstayîn de vajîya ke serra 2013 ra na het seba yewîya netewî gamê girdî amey eştiş û pêrokîn partîyanê sîyasî ra wazîya ke seba Kongreyê Neteweyî bi kombîyayişan destpa bikerê û cewab bidê na vengdayişa tarîxî.
Heta nika xêlê partîyanê zey GORAN, KODAR, Tevgera Azadî, Partiya Demokrat a Sosyalîst a Kurdistan, Partîyê siyasî yê Rojawa ra Partiya Demokrat a Kurdên Sûriyê, Partiya Yekîtiya Lîberal a Rojawa desteg day vengdayişê KCK û aşkere kerdî ke Kurdî ganî verîya ke berey bibo yewîya xo ya neteweyî virazê.
Kongreyê waştişê Rojhilatî yo zî
Hemserokê KODAR Fûat Bêrîtanî hewcedarîye Kongre ard ziwan û aşkere kerd ke bi Kongreyê Neteweyî raya qezencanê girdî êşkîyena bîro akerdiş. Bêrîtanî vist vîrî ke waştena şarê Rojhilatê Kurdistanî zî na ya ke partîyê sîyasî problemanê xo yê mîyanî bidê hetekê û bin bana Kongreyê Neteweyî de are bibê.
Bêrîtanî hayr ant qewimyayişanê Rojhelatê Mîyanî ser û vist vîrî ke Kurdistan de îmkan û talokeyê girdî estê. Hemserokê KODAR Fûat Bêrîtanî hayr ant modela weşîya wertex yê şaran û Federasyonê Bakûrê Sûrîye ser û aşkere kerd ke dewletê antî demokratîk wazenê modela demokratîk werte ra wedarnê.
Kongre raya Wesarê Kurdan akeno
Fûat Bêrîtanî hayr ant problemanê çar leteyê Kurdistan ser û aşkere kerd ke viraştişê Kongreyê Neteweyî do pêrokîn taloke û hêrişanê vera Kurdan pûç vejero. Bêrîtanî ard ziwan ke Kongre do Rojhelatê Mîyanî de raya wesarê Kurdan akero û va, “Zeîfbîyayişê Kurdan yeno maneya quwetbîyayişê hêzanê îşgalker û komanê terorîst.”
Hemserokê KODARî veng da pêrokîn hereket, partîyanê sîyasî yê kurd ke hemverê talokeyan bi mesûlîyeta xo hereket bikerê û qiseyanê xo wina domna: “Muhîm o ke pêrokîn quwetê Kurdistanî, taybetî hereketê sîyasî yê Rojhilatê Kurdistanî, viraştişê Kongreyê Neteweyî de xo mesûl bivînê û vernîya nayî de nêbê manî.”
Fûat Bêrîtanî vist vîrî ke zey KODAR ê vengdayişê KCK ya seba viraştişê Kongreyê Neteweyî muhîm vînenê û veng danê pêrokîn partîyan ke na hetî de gamî bierzê. Bêrîtan vist vîrî ke zey KODAR ê nayî ra hadre yê û ard ziwan ke ca nêardişê yewîya Kurdan do xîztemê dişmenanê ci bikero. Bêrîtan veng da partîyanê Rojhilatê Kurdistanî ke bin bana Kongreyê Neteweyî de bîrê pêhet.
Ganî kurdî bibê yew
Seba Kongreyê Neteweyî yê Kurdistan jew desteg zî Hereketê Îslamî ya Kurdistanî ra ame. Endamê Polîtburo Kamîl Mahmût ke derheqê vengdayişa KCK de qisey kerd aşkere kerd ke yê ke nînê yewîya neteweyî ganî bîrê berteref kerdiş. Mahmût vist vîrî ke gureyê viraştişê Kongreya Neteweyî ke 2013 de destpa kerdî çi heyf ke bi sebebê menfeatanê tayî partîyan nêresya hedefê xo û wina dewam kerd: “Yê ke nînê Kongreyê Neteweyî ganî bîrê berteref kerdiş. Partîyê sîyasî ganî vejerê teberê sînoranê menfeatanê xo û verva yewîya neteweyî gam bierzê. Ganî ma dewamê Kombîyayişa Selahadîn yê serra 2013 bîyarê û ser na esasî şirê yewîya neteweyî. “
Kamîl Mahmûtî aşkere kerd ke meseleya yewîya neteweyî ganî tenya meseleya KCK nêbo, bibo meseleya pêrokîn partîyanê sîyasî û va, ‘Ganî Kurdî bibê yew.
Sekreterê Partiya Sosyalîsta Demokratîk a Kurdistanê (PSDK) Mihemed Hacî Mehmudî zî cewab da vengdayişê KCK û aşkere kerd ke viraştişê Kongreyê Neteweyî do xîzmetê şarê Kurd bikero û destegê xo ciresna.
Desteya Damezrandina Enîya Demokrasîya Gel zî vengdayişê KCK ca de dî û aşkere kerd ke Kongreyê Neteweyî ganî bibo stratejîya wertex yê pêrokîn Kurdan.
YNK Kongre rê hadre yo
Derheqê vengdayişê viraştişê Kongreyê Neteweyî yê KCK jû vengdayiş zî Polîtburo yê YNK ra ame. Endamê Polîtburo yê YNK Ferîd Eseserd aşkere kerd ke ê seba Kongre hadre yê. Eseserd vist vîrî ke hewcedarîyê Kurdan her wextî ra vêşêr nika bi Kongreyê Neteweyî ra esto. Eseserd aşekre kerd ke ganî kongreyekê bi no rengî de stratejîyeke wertax ya neteweyî seba Kurdan bîro ronayiş.
Lazim o are bibê
Eseserd da zonayiş ke seba kongreyeke bi no rengî lazim o pêro hetî pêdiyayian virazê, meseleyanê xo qisey bikerê û va,“Muhîm o ke ma cayekê wertex de biresê pê û kongreyê xo virazê.”
Endamê Polîtburo yê YNK Ferîd Eseserd da zonayiş ke bi çarekerdişê meseleyanê Mûsil û Sûrîye do dewreke newî û hesas destpa bikero û wina qisey kerd: “Zey YNK ma kongreyekê bi no rengî ra hadre yê. Lazim o Kurdî are bibê û meseleyanê xo zerreyê xo de çare bikerê.
Kongre do meseleyanê Başûr zî hal bikero
Ferîd Eseserd hayr ant krîzê sîyasî û meseleyanê bînî yê Başûrê Kurdistanî ser û aşkere kerd ke mavêna 5 partîyê ke hikûmeta Başûrê Kurdistanî de ca gênê de problemî estê. Eseserd dîyar kerd ke eke Kongreyekê Neteweyî bîro viraştiş, dê îmkanê çarekerdişê probleman zî vejîyo werte.
Endamê Polîtburo yê YNK Ferîd Eseserdî da zonayen ke seba kongreyekê serkewtî muhîm o bingeheke rind bîro hadre kerdiş û va, “Rexmê her çî rewşa nikayî, viraştişê Kongreyekê Neteweyî ferz kena.”
NAVENDÊ XEBERAN