Endama Konseyê Serekîya Pêroyî ya KCKyî Elîf Ronahîye derheqê muhîmîya weçînayîşê 24ê Hezîrane de qisey kerde. Ronahîye dîyar kerde ke bi serran o Pazarcix, Elbîstan, Gurgum û dewê ci tim rayanê xo dayî CHP û wina domnaye: “Labelê nika nizdîbîyayîşê CHPyî yê kurdan dîyar o. Seba ke faşîzmê Erdoganî biqedîyo, ganî herkes wezîfeyê xo yê tarîxî bîyaro ca.”

Endama Konseyê Serekîya Pêroyî ya KCKyî Elîf Ronahîye derheqê weçînayîşê 24ê Hezîrane de qisey kerde û qala muhîmîya weçînayîşî kerde. Ronahîye dîyar kerde ke muhîmîya tarîxî ya weçînayîşan esta. Ronahîye daye zanayîş ke no weçînayîş do ameyeyê şaranê Kurdistan û Tirkîya dîyar bikero û wina va: “Ganî herkes bi nê zanayîşî şêro sindoqan ser. Wa şarê ma yê ke başûrrojawanê Kurdistanî de cuyenî, bi hawayo aktîf beşdarê nê weçînayîşî bibî. Bi serran o Pazarcix, Elbîstan, Gurgum û dewê ci tim rayanê xo dayî CHP. Labelê nika nizdîbîyayîşê CHPyî yê kurdan dîyar o. Ganî şarê ma yê başûrrojawanî nêyî bivîno û wezîfeyê xo yê tarîxî bîyarî ca.”

Ronahîye bale ante hêriş û qetlîyaman ser û wina dewam kerde: “Wazenî bi zextan şarî teslîm bigîrî. Erdogan wazeno reyna bêro weçînayîş. Cok ra seba nêyî wazeno qirkerdişan bikero. Wa bitaybetî gurgumij û elewîyî nînan bivînî û goreyê ci beşdarê weçînayîşî bibî. Kesê ke beşdarê weçînayîşî benî, wa dormeyê xo zî îkna bikerî û têkoşîn bidî.”

Yew raye daxî zaf muhîm a

Ronahîye qala fikrê ‘se beno wa bibo reyna Erdogan do bêro îqtîdar’ kerde û wina va: “No fikir şaş o û fikro ke heme çî sey qederî vîneno yo. Qirbîyayîşê kurdan qeder nîyo. Îqtîdar ra vistiş û peynîya faşîzmî ardiş destê ci de yo. Cok ra yew raye daxî zaf muhîm a. Wa şarê başûrrojawanî nêyî bizano. Nika firsendêko tarîxî vernîya ma de esto û ganî ma nê firsendî baş bikar bîyarî. Ganî elewîyê Gurgumî bi nê zanayîşî şêrî sindoqan ser. HDP do bendê weçînayîşî derbaz bikero û meclîs de temsîlkarîya sîyasetê demokratîke bikero.”

Wezîfeyêko gird keweno milê cinîyan ser

Ronahîye dewamê qiseykerdişê xo de wina va: “Ganî cinîyî bizanî ke her raye gula azadî û demokrasî ya û bi no hawa şêrî sindoqan ser. Eke HDP no weçînayîş de bendê weçînayîşî derbaz bikero, o wext do vera zayendperestîye de têkoşîn bido. Ganî cinîyî mabênê şaranê Anatolîya û Mezopotamya de rolê pirdî kay bikerî. Wa her cinîyêk bi desan kesan rêxistine bikero û bîşêro sindoqan ser. Eke HDP bendê weçînayîşî derbaz nêkero, o wext zîhnîyetê koletîye do bireso dûşto tewr berz.”

Wa wezîfeyê xo bikerî

Ronahîye peynîya qiseykerdişê xo de va ‘eke faşîzm nêqedîyo, o wext tena vera kurdan de nê, vera şaranê Tirkîya de do hêrişî zêde bibî. Seba rewşêka winasî nêro cuyayîş, wa herkes wezîfe û berpirsîyarîya xo bizano û wina hereket bikero. Eke HDP bendî derbaz bikero, o wext do bingeyê têkoşînî bivejîyo raste. Cinîyê kurdistanî û tirkîyayijî zî do nê bingeyî ser o aştîye awan bikerî. Ez bawer kena ke cinîyî do no weçînayîş de serbikewî. Ez weçînayîş de heme cinî û şarê ma rê serkewtiş wazena.”

 

ANF/BEHDÎNAN