Ma se beno şima kî zonê xo de qesey bikerê. Ma se beno şima kî zonê xo de binusnê, biwanê, bibermê, bihuyê... Qa şima ke qesey kerd weqete nêvejîna, qe dînya kî nêrijîna. Se bîyo şima re, şima no zon xo re kerd o tomete. Endî heşarê serê xo bibê û çêberê çêyê xo bi merhamet û bi royê Kirmancîye piştîye ser zonê xo re yakerê. Wextê zonê asîmîlasyonî nîyo, wext wextê kirmanckî qeseykerden a. Wext wextê vinetene nîyo, wext wextê wayîr vecîyen o. 


Êndî êy şima bes o

Şima re zamet mebo, şima kî rêyê xo ra perskerê vacê: "Zonê ma kotî ro, ma qey zonê xo ra kewtîme durî û qey bîmê xerîbê zonê xo? Qey hona bi zonê asîmîlasyonî qesey kenîmê?" Rojê nê persan bi rêze xo ra persê û ser o rind bifikrîyê hela şima qutîya eynî de kamî vînenê. Şima ke qutîya eyneyî de xo nêdî, bizanê ke şima kamîya xo ra, zonê xo ra kewte durî. 


Qey şima hondê zonê xo re bîye lal û kerr, qey?

Zonê ma nayê qet tewr heq nêkeno. Şima kam re û çinayî re xizmete kenê? Şima seba çinayî mucadele kenê û seba çinayî danê pêro? Ez ke zana mordem seba raxelesîyena welatê xo dano pêro, seba raxelesîyena zonê xo dano pêro û mucadele keno, seba kamîya xo dano pêro û mucadele keno, seba raxelesîyena qomê xo dano pêro û mucadele keno, seba azadîya miletê xo, seba heq û huquqê miletê xo dişmen de dano pêro û mucadele keno...


Şima se kerd?

Xebera şima tewr welat ra çîne bîye. Şima welat terkit şî û rêyna tewr welatê xo ser dîyarî nêbî. Zê her çî şima zonê xo, kulturê xo, bawerîya xo, zîyar û dîyarê xo, Pîr û Rayberê xo, qomê xo, raya xo, aj û amênê xo kerd ra xo vîrî. Şima seba raxelesîyena qomê xo û seba miletê bindestî mucadele nêkerde, şima kewt re taqala çepanê Tirkan û înan re xizmete kerde û şî nêzan seba kamî mucadele kerde. Şima roje "welatê ma kamcî hete de mend" vat? Şima roje bi zonê dayika xo "dayê, bawo, wayê, bira, heval, cîran..." vat? Ma şima caran zonê Xizir de kî "Ya Xizir!" vat? Şima her çî xo re tomete kerd bî, bira! Hona hona kî şima xo re kerdo tomete.

Ma se beno, zonê xo kirmanckî qedayê zonê asîmîlasyonî mekerê! Helbet her zon bi rengêro û naye re vatena ma çîn a, la her însanî kî bi rengê qesey kerdena zonê xo rind o. Coka însan bi rengê kamîya xo,  bi rengê zon û kulturê xo însan o. Nê degerê rind ke çînê bê, însanî kî çîn o. Na rindekîye ra ne xo marum virdê, ne zav û zêçê xo, ne kî aj û amênê xo marum virdê! 

Zon, simgêyê însanetîyênî yo û mordem xo mîyan de, bi zonî xo ano ra zon û îfade keno. Zon de muhîmîya tewr rindekîye, kî bêguman fikirîyayîş o. Însan bi zonê dayike fikirîno. Zonê dayike aracê edaletî, heq û huqiqî, kulturî, hunerî û aracê têduştîyo. Însan bi zon û kulturê xo, cuyena (heyatê) xo, nasnama xo û degeranê xo însan o.

Zon ke çînê bo însan kî çîno, jubîyena zon ke temîn nêkerde, mumkun nîyo ke ma ewro kamîya xo ra qesey bikerîme. No sebeb ra kî milleto ke zonê xo kerdo xo vîra ya kî millet o ke zonê xo re wayir nêvecîno sahneya tarix ra beno pak û benê mahkumê vîndbîyayîşî. Mordem ke zonê xo re wayir nêvecîya, wext ra zon û kulturê xo ra kuno durî û beno xerîb. Çike milleto ke zon û kulturê xo re wayîr vecîya kamîya xo re kî wayir vecino.


Xo înkar kerdene bêbextî ya 

Caran kamîya xo ra, zonê xo ra, kulturê xo ra, welatê xo ra durî mevinde. Şima şonê kotî şorenê ne kamîya xo, ne zonê xo, ne kî bawerîya xo caran înkar mekerê. Xo înkar kerdene heramzadenî ya. Xo înkar kerdene bêbextî ya, bêşerefî ya... 


Êndî bi zonê dakila xo qesey bike!

Çêyê xo de, wertê qomê xo de, cem û cematê xo de, misletê xo de... Eke ju çekuyê qesey kena kî, wa bi kirmanckî bo! Wa bi zonê dakila to, wa bi zonê bav û kalê to bo! Êndî bes o, mezele de asteyê baw û kalanê ma wa meziqitnê.