Piştî axaftina Amed Amûde ji bo birêvebirina civîne diwanek ji 3 kesen pêk tê hat hilbijartin. Piştre Endama Kordînasyona Tevgera Ciwanên Şoreşger a Herêma Cizîrê Sara Dêrik rapora 6 mehan ya kar û xebatên meclîsê xwend. Di raporê de hate diyarkirin ku pêvajoya niha wê qedera gelê Kurd ê li Rojava diyar bike û wiha hate domandin: “Pêşketînên li Rojava wê hem li ser pirsigirika Kurd a li çar perçeyên Kurdistanê, hem jî li herêmê bandorek xurt çêbike. Lê astengî jî hene. Niha jî dixwazin pêşiya tevlîbûna kurdan a civîna Cenevre-2 bigirin. Dixwazin bi vî rengî wekî Lozanê siyaseta xwe li ser gelê Kurd ferz bikin.”
Berpirsiyariya ciwanan
Di raporê de hate diyarkirin ku ciwan êdî jiyana heyî û bêstatûbûna welatê xwe qabûl nakin û ev tişt hatin gotin: “Serkeftin li çar parçeyên Kurdistanê nêzîktir bûye, gihîştiye qonaxa dawî. Di vê qonaxê de weke ciwan bi berpirsyarî tevgerandin, di her alî de derbaskirina asta heyî û bersîvdayîna pêvajoyê pêwîstiyek e. Heta ku hedefên me yên siyasî werin pekanîn û Rêbertî were azadkirin; bi tempoyekî xurt xwe birexistinkirin û di vê şoreşê de weke pêşeng bicîhanîna rola xwe ya dîrokî dibe berpirsyariya me.”
22 navendên ciwanan
Di raporê de xebatên 6 mehan jî hatin nirxnadin û derbarê xebatên hatine meşandin de ev agahî hatin dayîn: “Ji bo kampanyaya ‘Azadiya Rêber APO’ tevlîbuyînekî aktîf hatîye çêkirin, li hemû bajaran di çarçoveya kampanyayê de meşên girseyî hatin lidarxistin. Ji bo xwedîderketina Desteya Bilind û berxwedana YPG’ê di meha Tîrmehê de meşên girseyî hatin lidarxistin. Di meha Îlonê de ji bo pêşiya koçberiyê were girtin meş û çalakiyên cur be cur hatin organîzekirin. Di meha Mijdarê li hemû bajaran salvegera damezrandina partiyê bi çalakiyên cihêreng bi awayekî girseyî hate pîrozkirin.
Xebatên parastinê
Di vê dema derbasbûyî de ji ber şerê li herêma Cîzîrê , gelek kar girêdayî karên parastinê hatin meşandin. Li hemû bajaran di çarçoveya seferberiyê de xebat hatin meşandin û li Serêkaniyê, Çilaxa, Tirbespiyê û tevahiya bajarên herêma Cizîrê hem piştgiriya YPG’ê hate kirin, hem jî wekî bendên kontrole yên xweser hatin avakirin. Ji bo ku Ciwanên Şoreşger xwe bigihînin girseyên ciwanên herêmê, di warê ragihandinê de, li her bajarekê komiteyên ragîhandinê hatin rexistinkirin. Hejmara yekemîn a Kovara Ciwanan meha Heziranê hate belavkirin. Li herêma Cizîrê bi giştî hezar û 100 kovar hatin belavkirin.” Piştî xwendina raporê li ser rewşa siyasî, ciwanan nêrînên xwe anîn ziman.
ANHA/AMÛDÊ