Li Rojavayê Kurdistanê ji bo pêşxistina zimanê kurdî li hemû bajaran xebat tê meşandin. Bi armanca fêrbûn û pêşxistina zimanê Kurdî, hejmarek ji mamoste û xwendekarên zimanê Kurdî li dibistana şehîd Nezîr a Tirbespiyê û gundên derdora wê, piştî perwerdeya du mehan ezmûneyên zimanê Kurdî yên yekemîn pêk hatin. Şagirtan bi serketineke mezin ezmûnên xwe derbas kirin. Mamosteyên dibistana Şehîd Nezîr û şagirtan kêfxweşiya xwe anî ziman.


Li Helebê semîner
Ji aliyê din ve bi armanca pêşxistina zimanê kurdî û danesîna çanda kurdan, Yekîtiya Mamosteyên Rojavayê Kurdistanê li navenda Rustem a zimanê Kurdî ya li Helebê semînerek lidar xistin. Gelek mamoste û pisporên zimanê kurdî beşdarî semînerê bûn. Seroka Yekîtiya Mamosteyên Rojavayê Kurdistanê Gulîstan Sîdo ku weke qisekar tevlî bû, li ser girîngiya zimanê dayîkê û çanda kurdî û girêdana xurt a di navbera wan de axivî. Gulistan Sîdo diyar kir ku xwedîderketina li çanda kurdî bi pêşxistina zimanê kurdî mimkûn e. Sîdo di parastina kurdî de bal kişand ser rola huner û çanda kurdî ya stran û helbestan û anî ziman ku divê ev ji cewherê xwe û dûr nekevin. Sîdo da zanîn ku rola lêkolînvan û mamosteyan di pêşxistina giramêra zimanê kurdî de gelek mezin e û ji her kesî xwest ku ji bo pêşxistina ziman û çanda kurdî bi berpirsyarî nêzîk bibin û rola xwe bilîzin. 

ANF/DIRBÊSIYÊ