Di navbera 1 û 4’ê Cotmeha 2016’ê de li Silêmaniyê Festîvala Navneteweyî ya filman hat lidarxistin. Filmên ku tevlî festîvalê bûne çendek ji wan hatin xelat kirin. Her wiha xelata derhênerê herî baş jî ji bo derhênerê filmê ‘Yên Xaka Xwe Winda kirin’ Hewraz Mihemed hat dayîn.
 
Dengê Viyan Peyman
Derhênerê Kurd ê filma ‘Zewî Winbûwan(Yên Xaka Xwe Windakirin)’ Hewraz Mihemed der barê filma xwe de wiha axivî: ”Ez bi kurtefilmekî tevlî festîvala filman a navneteweyî bûm. Di kurtefilma me de qala jiyana ciwanekî ji Kobanê, piştî şer çêdibe û gel penaber dibe, dike. Belê ev ciwan û hevalên xwe li bajar dimînin û parastina bajarê xwe dikin.
Her wiha min di kurtefilma xwe de dengê Viyan Peyman bikar aniye. Viyan Peyman ji ber şervanek leheng bû li Kobanê şer kir û dawiyê de şehîd bû. Ez di aliyê manewî de vî xelatî diyarî ruhê Viyan û hemû şehîdên ku di oxira xaka Kurdistanê de canê xwe dane, dikim.”
 Viyan Peyman ji Rojhilatê Kurdistanê û şervana YPJ’ê bû. Di dema şerê dijî çeteyên DAIŞ’ê di 6’ê Nîsana 2015’ê de li Serêkaniyê ya Rojavayê Kurdistanê şehîd bû.

POLA PIŞDERÎ/ROJNEWS/SILÊMANÎ