Xelatgêranê Nobelî yê ke aşma Çele û Nîsane de seba qedîyayîşê tecrîdî di reyî veng dabi, na rey zî mektûbêk erşawite CPT rê. Xelatgêran vato ‘Qedênayîşê tecrîdî do rayîrê awankerdişê aşitîya Tirkîya akero û bibo gama destpêke’.
Rayberê Şarê Kurdî Abdullah Ocalan demêko derg o ke binê tecrîdêko giran de yo. Vera tecrîdî de sere de Hemsereka KCD û Parlamentera HDPyî Leyla Guvene û bi hezaran hepsîyan grevê vêşanîye dabî destpêkerdene. Hepsîyan ra 15ê ci grev açarnabî rojeyê mergî.
Wayîrê Xelata Aşitîye ya Nobelî Adolfo Perez Esquîvelî Komîteya Vernîgirewtişê Îşkenceyan (CPT) rê mektûbêk şirawite û hîşyar kerd eke vera zextanê dewletan de seba bindestan nêkewo mîyanê têgêrayîşî, a game do mazeretê estbîyayîşî yê sazîyanê Ewropa memanê, raste ra wedarîyê. Mektûbe bi nameyê Xelatgêranê Nobelî yê ke aşma Çele û Nîsane de seba qedîyayîşê tecrîdî di reyî veng dabi, ameye şirawitene.
Esquîvelî mektûba xo de vato ke bi nameyê Xelatgêranê Nobelî ma wazenê ke wa CPT babeta tecrîdî de hîna leze tê bigêro û ê pawenê ke CPT tavilî şiro serdana Îmrali. Esquîvelî ardo ziwan ke gama CPT dimayê nê vindertişê polîtîk û cimatkî yê menganê peyênan bikewo mîyanê têgêrayîşî do bieşko sîstemo ke heqanê Kurdan ê bingeyênan û yê hemeyê cimatî yo ke nêdîyayîşî ra yeno, tesîr ci rê bikero.
Mektûbe de pêvînayîşê roja îne ya Ocalanî ame vîr vistene û ame vatene ke pêvînayîş bi saya xoverdayîşê grevê vêşanîye ya Leyla Guvene û bi hezaran hepsîyan û bi paştdayîşê xurtî yê rayapêroyîyeya seba xoverdayîşî virazîyayo.
Sebebê estena înan nêmaneno
Mektûbe de dîyayo zanayene ke Ewropa, Amerîka û hemeyê dinya de xeylî sazî bi nameyê heqanê merdiman têgêrenê û wina ameyo vatene: “Nê sazîyê ke bi nameyê heqanê merdiman çar hetanê dinya de têgêrenê, eke birastî zî seba kesanê ke destê dewletan ra dej ancenê nêkewê mîyanê têgêrayîşan, a game sebebê estbîyayîşê înan nêmaneno. Qedênayîşê tecrîdî do rayîrê awankerdişê aşitîya Tirkîya akero û heqanê merdiman rê hurmet ramojîyo û bibo gama destpêke.
Pêşkêşê Wezaretî kerd
Heto bîn ra Heyeto ke grevê vêşanîye ke zîndanan de dewam keno taqîb keno, raporêk pêşkêşê Wezaretê Edaletî kerdo. Raporo ke ameyo pêşkêşkerdene de bale ancîyayo rewşa weşîye ya hepsîyan û şertê zîndanan. Raporê heyeto ke tede dezgehê sey ÎHD, TÎHV, OHD, ÇHD û sewbîna estî de ameyo vatene ke 92 zîndanan de nizdîyê 3 hezar hepsîyî grevê vêşanîye de yî. Heyetî rapor de neheqîyê ke zîndanan de benî zî rêz kerdî û waştî ke ganî heyetê xoserî zîndanan kontrol bikerî. Rapor de qala kesê ke zîndanan de seba wedarnayîşê tecrîdî canê xo feda kerdî, ameya kerdene û ameyo waştene ke wa îqtîdar berpirsîyarîya xo bica bîyaro û waştişanê hepsîyan qebul bikero.
AMED