Seke yeno zanayene 22ê Nîsane sey Roja Rojnamegerîya Kurdî yena pîrozkerdene û emser serrgêra 121. o. Bi wesîleya na roje Rojawanê Kurdîstanî de aktîvîteyêk ame viraştene û aktîvîte de xelatî dîyayî rojnamegeran.
Xeylê rojnamegerî beşdarê aktîvîteyî bîyî û salona ke aktîvîte tede ame viraştene de posterê şehîdanê çapemenîye û pankartê dezgeyanê çapemenîye ameyî aliqnayene. Xeylê rojnamegerê xerîbî zî beşdarê aktîvîte bîyî.
Aktîvîte de Hemserekê YRA Sîpan Canî qisey kerd. Canî Roja rojnamegeran pîroz kerd û wina va: “Rojnamegerê kurdî seba ke heqîqete bivejîyo raşte, xeylê bedelî dayî û hîn zî danî. Çapemenîya kurdan hertim zehmetîyan reyde têkoşîn dana.” Qiseykerdiş ra dima sînevîzyonêk ame nawitene û xelatî dîyayî rojnamegeran. Xelatî hetê dayîke û pîyê Şehîd Mazlûm Bagokî ra ameyî dayene.
Xelatî dîyayî Fîras Kilan, Sozdar Oremare, Cîhat Derwîş, Hoşeng Hesen, Hebîb Zavê, Hamzê Hemkê û Îdrîs Hesen. Heto bîn ra temînatname dîya Gulîstan Mihemmede û Îbrahîm Ehmed. Helîn Gabare, Elî Kilzî, Merwan Qamişlo û Fêrîd Edwar zî sipasname girewtî. Aktîvîte bi deyîranê Ciwan Cemîl û Sefqan Orkêşî qedîya.
ANHA / QAMIŞLO