Ame zanayene kesê ke sereştişê keyeyan de ameyê tepiştene wextê sereştişî de Qereqolê Cendirmeyan de îşkence înan rê ameyo kerdene. Rîyê îşkenceyî ra dest, linge û sereyê xeylî kesanê ke ameyê tepiştene, şikîyayê.
Baroyê Amedî 18ê Gulane de eşkerayîyêk serê hesabê Twîtterî ra da û vatibi ke derheqê îşkenceyî de delîlê verbiçimî estê û tayê versûcan zî nezaretê polîsan de avûkatanê dir pêvînayîş kerdo. Baroya Amedî derheqê îşkenceyî de vatbi ‘îşkence goreyê qanûnanê neteweyîyan û mîyanneteweyîyan qetîyen teberê huqûqî de yo’ û wina dewam kerdbi: “Hayîdarî amîya ma ke 12 kesê ke qezaya Xelfetî de ameyê destbendkerdene, înan rê îşkence ameyo kerdene. Pêropîya 35 kesî tepişte yî. Bi hawayêkê nêhuqûqîyî heqê pêvînayîşê avûkatan ameyo astengkerdene. Pêvînayîşê tayê avûkatan zî nezaretê polîsan de ameyo kerdene. Delîlê verbiçimî estê ke îşkence ameyo kerdene.”
Serekê Merkezê Heqê Merdiman ê Baroyê Amedî Gokhan Dayikî eşkera kerdbi ke kesê ke ameyê tepiştene îşkence înan rê ameyo kerdene. Dayikî ard ziwan ke tepiştişî dewam kenê, nameyê 38 kesanê ke ameyê tepiştene resayê înan.
Mehlaya Derto ya qezaya Xelfetî ya Riha de şerê 18ê Gulane de hetkarê komîserêkê têgêrayîşê taybetî amebi kiştene, 2 polîsî zî birîndar bîbî. Hedîse ver dormegirewtişê leşker û operasyonê mehlaya Derto dewam keno. Dewa Derto û dewanê dormeyan de têgêrayîşo leşkerî dewam keno.
ANF / RIHA