Cigêrayox û Nuştox Ethem Xemgîn ke derheqê elewîtîye û tarîxê Kurdîstanî de xeylê eserê ci estbî, wefat kerd. Federasyonê Elewîyanê Demokratîkan (FEDA) derheqê wefatê Xemgînî de îzehetêko nuştekî da.
FEDA îzehetê xo de vato ‘Ethem Xemgîn vera polîtîkayanê înkar û îmha de seba ke tarîx, ziwan, nasname û reyanê xo bido cuyayene, têkoşîn da’ û wina dewam kerdo: “O derwêşê serdemê modernî bi û tarîx do ey xo vîra nêkero. Derheqê bawerîya zerduştî û Raya Heqî de cigêrayîşê muhîmî kerdî û xeylê eserî dayî. Xemgîn 38 serrî bi ke surgun de cuyayêne û 2 rojî verê Koln de wefat kerd.”
FEDAye îzehetê xo de ca daya melumatê Xemgînî yê nasnameyî û qala cuyayîşê ci kerda. FEDAye dîyar kerd ke tazîyeya Xemgînî do Dergahê Elewîyanê Leverkusenî de bêra qebul kerdene. Adresê tazîye no yo: Overfeld Weg 34 A, 51371 Leverkusen.
ANF / BRUKSEL