Xêr ama, sare û çimanê ma ser ama, Newroza ma!
Ti yena, hama nêweşiya girane ana, fîna koma.
Waxtê to ke ame, Anqara de onca jû nêweşiye bena har.
Newroze bena qir û qotik kuna ciger û velukunê dewlet û hukumatî.
Sermiyanê Anqara de kunê koma Newroze.
Kurdîstan de valiyê tirkî benê bekçiyê herfan.
Dest de tifongî desu ra, kemeru ra, afîş û plakatu ra hefu kenê saye. Newroze seweta sermiyananê tirkî alerjiyode xiravin o. Xêra heqî ser na nêweşiye ra mirenê.
Belka emser hukumat rîwalê herfan ra Newroze qedexe nêkeno, hama anqarayizan de dêkûdolavî nêqedînê.
Herfê ma zî hona tam qebul nêkerdê.
Medeniyetê xo honder o. Medeniyetê Bülent Arınçî.
Xojîbê ma bo ke, sar herfanê mara honde terseno!
Ma gune xo peyê kemer û dêsan de wedarîme, waxtoke jû azayê hukumatê tirkî ame, vajîme W, va zerûpiskê xo pirtleyî bê. Zovîna tewa lazim niyo. No ters cirê bes o.
Amed de onca nunerê dewleta gonewere valî, afîşê Newroze xorê kerdî hedef û kerdî qedexe.
Sloganê Newroze, ya azadî, ya azadî ra tersenê..
Dewlete emser Kurdîstan de xêman de rafîştîsê Çanakkale kerdî ra. Batman de niya kerd. Amed de afîşê Newroze nayî ro, hurêndya înan de afîşê Çanakkale darde kerdî.
Manê naye çiko? Na dewlete mara vana: Şerê seweta ma Çanakkale de bimirê, xorê serbestiye mewazê.
Hallo, belka bavûkalê mi seweta sima Çanakkale de do pêro, ez nêwazen seweta sima xo bilewnî. Fambikerê endî!
Hata ewro vatenê ‘Newroze bimbarek mekerê’ nika vanê ‘roşane 21ê adare dera’ gune a roze bimbarek bo. Naye valî vanê. Fermandarê xo Îdrîs Naîm Şahînî ferman do.
Halla halla! Newroze biya roşana fermî xebera ma çîna!
Ebi na mane hama hama pêro cayan de pêzevangunê AKaPe, valîyan, Newroze kerde qedexe. Mi cor vat, dêkûdolavê Osmanî nêqedînê.
Hona ke waxtê Newroze nêame bî, dewleta tirkî ebi çapemeniya xo zurûpolî vaydayî. Vat: Kurdî emser Newroze de gonî verdanê de, planê xo yê ganinî estê.
Dewlete wazena hem miletê ma bimbarek kerdene ra dûrî fiyo, hem ters xof vila kero. Tabî armancê dewlete Newroze de provakasiyon virastena.
Coka nika ra spekulasyonunê niyanenu kena vila.
Raştiye de derdûkulê hukumatî bimbarek kerdena roşana ma qedexe kerdena. Hama hukumatê Anqara çiqas teqetîn beno bibo, qomê ma naye rê desture nêdano.
Çike na jû roşan a, roşana xelese, roşana weşiye wa. Bimbarek kerdena na roze endî marê biya odet. Kes zî honde rehet odetê xora nêtexelîno.
Seweta na roze xêlê însanan weşîya xo sanê adirî ver. Mazlum Doğan û Zekiye Alkan naye rê numune yê.
Na semedra qomê kurdî, binê her şertan de na roşane rê hata nika wayîr vejiya. Kurdî hen bîlaseve nêameyî na roze.
Hetê Kurdan ra wajiya Newroze ebi haştiye û bêzor bêro bimbarek kerdene. Hama dewleta tirkî onca zî her serre taye cayan de est numayîsanê Newroze ser.
Se kerîme famê xo yê demokrasî niya mîr biyo!
Sermiyana zor û zorvajiye dewleta terorist a. Bimiro na dewleta qetilkare!