Heyetê HDP aşkere kerd ke weçîntayîş seqet û îxlal o û waşt ke weçîntayîş bîro betalkerdiş. Heto bîn ra HDP derheqê Serokê YSK Sadî Guven de serpirodayîş û gerreyê sûcî kerd.
Serokwekîlê Koma HDP Ahmet Yildirim, Parlamenterê HDP Mithat Sancar, Îmam Taşçier, Ertugrul Kurkçu, Muslum Dogan û Bedîa Ozgokçe Ertan û rêxistina HDP ê Êlihî seba betalkerdişê referandumî serpirodayîşê YSK kerd. Serpirodayîşî ra dima heteyî salona YSK de îzahatekê da.
Ser nameyê heyetî Mithat Sancarî vist vîrî ke şert û mercanê OHALî de û nêzeypêyî de referandum virazîyayo. Sancarî aşkere kerd ke xêlê rêgezî amey îxlalkerdiş û wina va: “Heqê weçîntayîşî ê demokratîk amey îxlalkerdiş. Prosesê referandumî de hem medya, hem îmkanê dewlet seba “Ya” amey seferberkerdiş. Taybetî de sûkanê Kurdan de vengê komî amey xebetnayîş. Xêlê delîl û belge estê ke şixulnayenê vengan ameyê îxlalkerdiş û sextekarî ameyê kerdiş.”
Ganî weçîntayîş kok ra betal bibo
Sancarî ard zon ke weçîntayîşî de pusula û zerfê bê mor ameyê eştiş û YSK zî na jûwe rewa dîya û zey “Ya” qebûl kerda. Sancarî vist vîrî ke no goreyê hiqûqa weçîntayîşî nîyo û vatişanê xo wina ramit: “YSK, qebûlkerdişê zerfanê bê mor, sûkanê Kurdan de bado ke sindoqî amey akerdiş ra dima girewt. Qerarekê winayî verî ra çinêbi. No îxlaleke gird o. No îxlal sebebê betalkerdişê pêrokîn weçîntayîşî yo. Bi na qerarî raya vernîya tespîtkerdişê reyanê teber, ameya girewtiş.”
Mithat Sancarî vist vîrî ke na jû dûştê xala 101. yê weçîntayîşî ya ke yeno vaten ke “Zerfê bê mor nînê qebûlkerdiş.” Sancarî aşkere kerd ke no qerarî ra dima hinî mumkin nîyo ke netîceyanê weçîntayîşî raşt bikerê û va, ‘Ganî weçîntayîşî kok ra bîrê betalkerdiş.’ Sancarî tewr peynî de ard ziwan ke eke YSK nêwazena bibo amûra kayan ganî no weçîntayîşî betal bikero.
Derheqê Serokê YSK gerreyê sûcî
Heto bîn ra HDP derheqê Serokê YSK Sadî Guven de gerreyê sûcî kerd. Heyeta HDP ke Serokwekîlê Koma HDP Ahmet Yildirim, Wekîlê HDP û hiqûqnasê HDP ra ca amê, derheqê Serokê Lijneya Weçîntayîşî ya Berz (YSK) Sadî Guven de serpirodayîşê sûcî kerd û gerreyê Guvenî kerdî.
Heyetî serpirodayîşê sûcî ra dima ver edlîyeya Enqere de îzahatekê day. Serokwekîlê Koma HDP Ahmet Yildirimî ard ziwan ke Serokê YSK û endamê ci bi aşkere wayîrê wezîfeyê xo nêvejyayê. Zey ke xo înkar bikero bi destê xo şik û perde vist ser referandumî. Yildirimî aşkere kerd ke heta ke qerarê betalkerdişê referandumî nêgîrê, no referandûm rewa nîno qebûlkerdiş. Yildirimî vist vîrî ke YSK wezîfe û misyonê xo raya xerab de şixulnayo û waşt ke daraz gaman bierzo.
Heto bîn ra Verfeka CHP Selîn Sayek Boke zî aşkere kerd ke CHP do hemverê “Reyanê bê morî“ wezîfeyê xo bîyaro ca û eke hewce bikero do xo “Meclîs ra bianco“.
DÎHABER/ANQARA