Bi wesîleya serrgêra qirkerdişê Parîsî seranserê Ewropa de Sakîne Cansize, Fîdan Dogane û Leyla Şaylemeze bi çalakîyan ameyî vîrardene.
Hîrê cinîyê şorişgêrî yê Kurdan Sakîne Cansize, Fîdan Dogane û Leyla Şaylemeze yê ke 9ê Çile ya 2013î de paytextê Faransa Parîs de ameyî qetilkerdene, serrgêra şeşine ya kişîyayîşî de xeylî merkezanê Ewropa de ameyî vîrardene.
MARSÎLYA
Bajarê Marsîlya yê Fransa de hetê Meclîsê Cinîyan ê Arîn Mîrkane de vîrardişêk ame organîzekerdene. Ame vatene ma şima xo vîra nêkerdî do vîra mekerê.
LAVRIO
Bajarê Lavrio yê Yunanîstanî de zî Cansize, Dogane û Şaylemezî ameyî vîrardene. Aktîvîteya ke rayberîya têgêrayîşê cînîyan de ameye viraştene bi seyan kesî tewrê ci bîyî.
ZURÎH
Bajarê Zurîhî yê Swîsre de zî Meclîsê Cinîyan ê Berîtane seba protestokerdişê qirkerdişê Parîsî çalakîyêk organîze kerde. Vernîya konsolosxaneyê Fransa de ame waştene ke wa qetilkarî bêrî cezakerdene.
LUZERN
Bajarê Luzernî de zî rayberîya Meclîsê Cinîyan ê Arîn Mîrkane de aktîvîteya vîrardişî ameye viraştene.
Reyna bajaranê Lozan, Basel û Bernî yê Swîsre de zî aktîvîteyê ameyî viraştene.
BERLÎN
Paytextê Almanya Berlîn de semedê protestokerdişê qirkerdişê Parîsî aktîvîstanê JXK û JCAyî çalakîya bêîtaatîye ya sivîlî viraşte.
Reyna Meclîsê Cinîyan ê Destane zî vernîya seferîya pîlî ya Fransa de çalakîyêk organîze kerde.
KOLN
Bajarê Kolnî yê Almanya de zî rayberîya Meclîsê Cinîyan ê Vîyane de vernîya Kîliseya Domî de çalakîyêk ameye viraştene.
STUTTGART
Stuttgart de zî rayberîya JXKyî de cinîyanê ciwanan Unîversîte de vilawekî vila kerdî û vat ke ê do mucadeleyê Cansize, Dogane û Şaylemeze bidê dewamkerdene.
MUNÎH
Munîh de zî vernîya konsolosxaneyê Fransa de bi çalakîyêk Sara, Rojbîne û Ronahî ameyî vîrardene.
DUSSELDORF
Bajarê Dusseldorfî yê Almanya de vernîya konsoloxaneyê Fransa de çalakîyêk ameye viraştene. Qiseykerdişo ke bi nameyê Însîyatîfê Cinîyan ê Nalîn Mûşî ame kerdene de ame vatene ke cinîyê Kurdan do heta bicaardişê edaletî mucadeleyî rê dewam bikerê.
FRANKFURT
Bajarê Frankfurtî de zî Kurdistanijî û dostê înan vernîya konsolosxaneyê Fransa de ameyî têhet û vera qirkerdişî hêrsê xo ard ziwan.
HILDESHEIM
Bajarê Hildesheimî yê Almanya de zî hîrê cînîyê şorişgêrî bi aktîvîteyêk ameyî vîrardene. Aktîvîteya ke rayberîya meclîsê cinîyan de ameye viraştene bi slogananê ‘‘Jin Jîyan Azadî, Sara, Rojbîne, Ronahî‘‘ ameye qedînayene.
MERKEZÊ XEBERAN