Wexta ma anênê siyaset, polîtîka û nizdahîya dewletanê dinya ra (Welatê azadîwaşteyan ra bigî heta welatê komonîst û sosyalîstan, welatê demokratan ra bigî heta xoserîwaştan bi xo zî) her tim verê dagirkeranê Kurdistanî de ca giroto û semedê bindestkerdişê şarê kurdî çi destê înan ra ameyo texsîr nêkerdo û heta roca eyroyîne zî serê a xêze xo de şinê.
Ayê ke çimêke berzê tarîxa rejîmê dewletan go zehf bi rehetî destekê dewletanê dinya dagirkeranê welatê ma rê bivînê. Helbet semedê cay aye yo stratejîk desteko zehftir zî Tirkiye rê ameyo dayîşî û hema zî deyêno. Eyro roc mîyanê ravêreyîya çareserî de eke dewleta AKP’î cesaret kena bi rehetî tûtanê kurdan ser de raybazê qirkerdişî bi ca bîyaro ancî bi destekê dewletanê dinya yo.
Dewleta AKP’î ke bi destekdayoxanê xo zana, di ravêreyîya çareserî de semedo ke mafanê kurdan nêdo bi heme qayde raybazan kurdan ser de amî û yena. Hetêke ser semedo ke karê aye ravêreyî (pêvajo) de esto red nêkerd û mîyanê rayapêroyî de zey ke ay rayîrî ra şina xo mot ra.
Bi ay awayî hukûmat û ordîya xo rê warêke bêxetere ke tede bê ters cirît berzo viraşt. AKP’î mîyanê na ravêreyî de operasyonê lejkerî berdî gerîlan ser, operasyonê binçimkerdişî berdî serê sivîlan, xozaya Kurdistanî bi bendawan û qaleqolan kerde xira, îşkence ant kuçeyan, şaro sivîl kişt û nika ana ameyo astêke eke bi çimesûrî verê xo dayo tûtanê kurdan û dest bi kiştişê tûtan kerdo.
Tenê Cîzîre de mîyanê aşmêke de panc hebî tûtê kurdan bi guleyanê polêsanê AKP’î ameyî kiştişî û heme hemverê na çimesûrîya înan xo ro kerrî û korrî danê ro. Ma heme zanê ke dewleta Tirkiyeye qiwetê xo yê siyasî û lejkerî pîya dewleta Amerîka, Evropa û zbn. ra gêna. Roco ke kurdan beyrayê xo dagirkeran rê kerdo a heta nika bi çekanê heme dewletanê dinya ameyê kiştişî.
Hem şarê tirkî hem dewletê dinya ke vatişê mafê merdimahî fekê înan ra nêkono û çi heyf ke hem zî şarê kurdî ke goş, çim û ziwanê înan rast ro dejenerasyonê dagirkeran ameyo hemverê nê qirkerdişî korr, kerr û bê veng ê. La wa dewlete Tirkiyeye û dewletê dinya nêkerê xo vîr ra ke kurdî kurdê bancas se serre verî nîyê.
Eyro roc şarê kurdî zî bi xebatêka fîdakar e ya Rayverî û partîya xo bîyê wayîrê qiwetê lejkerî û sîyasî pîya. Bawerîya kurdan esta ke hindî ti qiwetêke nêşkeno bêhesab înan ser de bêro û roc bi roc vernîya rayîrê xoserî ro înan û heme şaranê Kurdistanî bîyo. Xo ra xoverdayîşê Kobanê de zî ame ramoştişî ke lazim o dewlete Tirkiyeye hesabê ay awayî bikero û lazim o ke dewletê dinya zî xêze xo rayke bîne çimanê xo ver derbas bikerê.

Nesirin Navdar