Vizêrî şewe ra Koyê Şengalî de va û vartîşî dest kerdo ci ke pers mekerê. Ti vana qey heyfa hezar serran gêno. Şîlîye varena se varena şima bêrê bivînê! Tenê şîlîyê bivaro weş o. Mesele vayî de ya. Vartîş û va pîya zerrîya mordemî visnenê. Ti vana ha nika banî ser sereyê ma ra rakero. Ya kî mordemî rê hînî êno ke ti vana hama nika cayo ke ma sereyê xo kerdo ci raqilayno û bero. Hurdmîn pîya cuye danê vindertene. Kam çêr o keye ra vecîyo! yanê holike ra! Cayê ma xirab nîyo. Ma pêro qavê kulinde ardê binê dilopan de nayê ro la ma halê xo ra razîme ez bi xo razî ya. Mi rê do piro. Ez xo rê wanena û nusnena. Cayê ma germin o.
Şewe dest pêkerd bê mabên va û vartîş bî heta verê şanî. Verê şanî ma hew dî ke bî ya. Tîje çîn a la hewa hema hema bî pak a. Şengalijî zaf- şenik heywanan kenê weyî. Zîyaderî mî û bizinan kenê weyî. Senî ke hewa tayê bî ya Şengalijan ca de pesê xo verdayî viradanê koyê Şengalî. Viradeyan de vaşo zerd û telî zaf ê. Yê ke şonê verê pesî kî domanê. Zaf şenik pîlî şonê ver. Zîyaderî domanî şonê. Keynek û lajekî şonê.
Senî ke va û vartîş vinet mi kî xo êşt teber. Mi dî ke Xidir hawo cêr a pes dayo xo ver ano. Xidir wendekar o. Şono refa diyîn e. Cemê şodîrî şono mekteb cemê şanî şono verê pesî. Zaferî domanî sey Xidirî yê.
Keyfê Xidirî keyf o. Xidirî verê pesî dayo jor rameno û kilaman vano. Bi vengêde berz Kilama “Hatin hatin YBŞ hatin” vano. Xidir kilaman vano la Xidir cemedîno. Ez vana qey seba ke xo germ bikero kilaman vano. Kincê Xidirî goreyê serd û seqema Koyê Şengalî nîyê. Xidir zerrîya mi dax keno. Wazena Xidirî zerrîya xo de wedarî la kanê! Xidir sey Welatê Qemerî qemer o. Vengê Xidirî kî vengo koyî yo. Koyê Şengalî ra gureto vengê xo.
Hewayê pakayî zaf derg nêkerd. Senî ke Xidirî pes berd cayê çereyî va û vartîşî dest pêkerd. Na rey şîlîyê nêvarena, torge varena. Xidirî nêzana ke çi ame ser. Ca de pesî verê xo da keyeyî û Xidirî da dima pesî. Mi pey ra çiqas veng da nêda Xidirî vengê mi nêheşna. Ez bawer a heta ke rêşt holike bî şil û pil.