Bi Hemserekanê HDP Selehattîn Demîrtaş, Fîgen Yuksekdage û Serekwekîlê Koma HDP Îdrîs Balûken 8 parlementerê HDP ameyî tewqîfkerdiş û erşawîyayî hepisxane. Tewqîfbîyayîşê parlementeran ra ver Hemserekê Şaredarîya Bajarê Girdî yê Amedî Gultan Kişanake û Firat Anli ameybî tewqîfkerdiş. Dima ra zî Şaredarîya Bajarê Girdî rê qeyûm ame tayînkerdiş. Nê bîyayîşê peyênî sere de şarê kurd pêroyî de kesê ke ray dayê HDP rê heqeretêk o. Nê heqeretî newe nîyê û bi serrano ke şarê kurd û muxalîfê ke no welat semedê demokrasi û azadî mucadele kenê rê benê. Seke ma zanê ke hukmatê AKP her wext behsê weçînitişî keno û vano ‘ganî kesê ke bi weçînayîş ameyî sere bi weçînayîş bêrê war’ rast o eynî wina yo. La çîyo ke AKP vana nêana ca. Yanê no vatiş xapitiş o. La AKP çîyo ke xo rê wazena ê binan rê nêwazena. Her tim yeno vatiş ke Pêxemberî vato ‘ eke ti nêwazenî çîyo ke to rê bêro kerdiş ganî ti ê çî seba kesanê binan zî nêwazî’ na zî rast a û ganî her keso ke xo wayîrê wicdanî vîneno wina bifikrîyo.
Ma nê vateyê Pêxemberî ser o biewne AKP ra. AKP û muhefezakarî her tim tersêne ke kemalîstî çîyêk bîyarê înan ser. Rasta ci kemalîstan sere de kurdan no welat de her kesî rê neheqî kerd. AKP wexto ke amey sere her tim xo kerd mexdur û va ‘ ma zî mexdur ê, hetanî nika ma zaf derbe werd. Êdî Tirkîya bi ma ver bi demokrasi şina.’ 27 Nîsana 2007 de muxitiraya Sererkanî ra hetanî teşebusê derbeya 15ê tammuze AKP bi vatişê demokrasî û edelet şarê Tirkîya ant xo kişt û înan ra va ‘ma derbeyan de mucadele kenê û derbekaran rê hesab pers kenê’ Gelo ma nika ameyî çi merhela?
Derbekaran rê hesab
nêame perskerdiş,
Kenan Evren bi keyfe xo merd,
Meselaya kurdan
nêameye safîkerdiş,
Meseleya Elewîyan
êameye safîkerdiş,
Feqîr hîna zêde bi feqîr
zengîn hîna zêde bi zengîn,
Ekolojîya welatî her roj yew derbe girewt û xoza yena çînkerdiş,
Çapemenî xora azad nêbî la yew tek rojname û TVyo muxalîf nêmend,
Hesabê qetlîam û faîlê nêdîyaran nêame dayîş,
Hepisxaneyê welatî bîyî pirr,
Edelet nêame ca,
Û ma her roj raştê yew neheqî yenê. Neheqîya peyêne mîyanê neheqîyan ra neheqîya tewr gird a. Tewqîfbîyayîşê parlementeranê HDPîyan ra zî fehm beno ke yew konsepto newe ameyo sere û no konsept keno ke sîyasetê kurdan çin bikero. No konsept hesabê xo wina kerdo. Aye ra çîyê ke ma vanê ‘ney, mumkin nîyo wina yew çî bikerî, eke wina bikerî kurdî dewlete rê nefret kenê’ benê. Ma tay çîyê xirabî pawitêne la hende neheqî nêpawitêne. Padîyayîşê ZAROK TV û Rojnameyê Azadîya Welatî nêpawitêne. Tepişyayîşê parlementeran nêpawitêne. Ma vatêne ‘ney, nêeşkenê hende zî bêhemdî bikerê’ La her tewir xirabî û neheqî amey kerdiş Dest ronayî mektebe kurdan, şaredarîyê kurdan û îradeyê kurdan ser.
Înan semedê terse, semedê seltanatê xo û nefretê xo her çî kerd. Xirabîya ke nêamey aqilê ma zî kerd. Çîyo ke nêwaştêne wa înan rê bêro kerdiş kerd. Muslumantî ra vejîyayê. Çim vist nanê mamosteyanê kurdan. Yanê AKP çi xirabîya ke rîyê erdî de esta kerd.
La yew çî xo vîr ra kerd. O zî xoverdayîş û teslîmnêbîyayîş o. Eke şima xoverdayîşo ke parlementeranê HDP şewa ke ameyî tepiştiş bîyarî xo vîr şima fehm kenê ke ez se vana.