Kitabanê dînî de kiştiş çinyo
Hemserokê Federasyonê Alewiyê Demokratîk Erdogan Yalgin’î waşt ke alewiyê ke Kurdistan, Tirkiye û Awrûpa de cuwyenê, serva qedînayişê herbî bikewê hereket. Yalgin’î viste ver ke, herbo ke bi aşma Mijdarî ra tepya destci kerd, her ke şino beno berz. Yalgin’î vist vîrî ke Kurdî şarê qedîm yê nê hardî yê û wina dewam kerd: “Kurdî û Tirkî piya bi hezaran ser cuwuyay. Qe jew kitabê dînî de kiştişê însanan çinyo. Gune alewî serva qedînayişê no herbî bikewê hereket.
Serokê verî yê PSAKD Kemal Bulbul’î zî vist vîrî ke şarê Kurd statuyê xo zey xoseriya demokratîk bi name kenê û wina va: La dewlet cayo ke na waşten qisey bikero, polîtîkayanê xo yê înkar û jûyî de israr kena, na waşten açarna qetlîaman. Bulbul’î da zonayene ke, îtiqatê alewiyan de cuwyayişê xoser û azad muqades o. Bulbul’î çiyê ke wextanê peynî de qewimenê zey wehşet û tecawizê biyayişê şarî biname kerd û ard ziwan ke no herb qilêrînê qilêrînan o.
Kemal Bulbul’î vist vîrî ke hometa alewî bi xo mazlûm a, nayî ra gune bibo kirdeya xoseriya civakî û cuwyayişa demokratîk. Bulbul’î da zonayene ke, xorayverîno ke Kurdî waştena ci kenê zey sîstemê ocaxanê alewiyan o û wina va: “Sîstemê ocax yê îtiqatê ma kî, modelê civakî yê cuwyayişê xoser o. Vatişê ma yê derheqê waştena xoser meşrû, xozayî û ca de yo. Nayî ra gune hometa alewî him serva xo him kî serva pêrokîn şaran tekoşîna demokratîk ya ke şarê Kurd da destcikerdiş biramno.
DÎHA/DERSIM