Çalakîya grevê vêşanîye ya Nurîye Gulmene û Semîh Ozakçayî roja xo ya 255. de dewam kena. Vizêr roniştişê 4. yê mehkemeya Gulmene û Ozakçayî estbî.
Mehkeme Kampusê Zîndanê Sîncanî de dest pêkerde. Avûkat, çalakgêrê ke beşdarê çalakîyanê piştîdayîşî yê Cehdeyê Yukselî benî, Velî Saçilik, Acun Karadag û parlamenterê HDP û yê CHPyî beşdar bîyî. Reyna Semîh Ozakça zî bi wesayîto tekerin beşdarê roniştişî bî.
Gulmene bi telekonferansî beşdarê doze bîye. Senî ke Gulmene ekranê televîzyonî de asaye, herkes bi çepikan destek da Gulmene. Seke yeno zanayîş heta nika fotografê Gulmene nêdîyayêne rayapêroyîye.
Gulmene dest bi îfadedayîşî kerde û wina va: “Ez kesê ke xoverdayîşê Yukselî de ca gênî yewe bi yewe bi zerrîye silam kena. Merdimî dejê ma pare kerdî. Esra Ozakça, Mehmet Guvel, Ferîdun Osmanagaoglu û Îsmaîl Erdoganî vêşanîya ma pare kerdî. Ez silamanê xo seba Mamosta Acunî, Kekoyê Welî, Nazîfe, Mehmet, Sultane û herkesî rê kena. Ez hemînan rê sipas kena. Bitaybetî parlamenter û avûkatan rê. Bi hawayo kêfî ma nêanî mehkeme.”
Gulmene ge-gane mecbûr mende ke mabên bido qiseykerdişê xo. Gulmene wina domnaye: “Ez şert û mercanê xirabinan de manena. Odeyê mi de hertim roşnîyêk esta. Eke ez grev de nêba zî, ez nêşêna rakewa. Ez bi aşman o binê tecrîdî de ya. Fotografkêş daxî nêşêno fotografê ma bianco. Mi pawitişêko hîra amade kerd. Ez akademisyen a û seba ke ez beşdarê çalakîyan bîya mi rê tehqîqat abî. Ez seba ke şîya vengdayîşanê sendika, mi rê tehqîqat abî. Herçiqas ke mi tezê xo qedênaybî, mi ra vatî to nêqedênayo û mi dure kerdî. Mi 9ê teşrîna peyêne de dest bi çalakîye kerd. Ez ewro îqtîdarê AKPyî ra hesab pers kena. Ez tena karê xo wazena.”
Dima ra avûkatê Gulmene Omer Faruk Emînagaogluyî qisey kerd û wina va: “Muwekkîla mi pawitiş nêkena, tena rewşe ana ziwan. Wa qiseykerdişê muwekkîla mi sey pawitişî derbaz nêbo. Heta ke muwekkîla mi nêro mehkeme pawitiş nêkena. Nika tena çira dest bi çalakîye kerdo vana.”
MA/ANQARA