Hemseroka Konseya Rayverîn ê KCK Besê Xozad derheqê rojdem û atmosferê sîyasî yê Tirkîye de qisey kerd û da zonayen ke Tirkîye kaos û krîzî mîyan de ya. Xozad vist vîrî ke, sebebê kaosê zereyê hukumeta AKP, xoverdayişê Kurdistan û quwetanê demokrasî yo.

Besê Xozad tewrê bernameyê ‘Polîtîk Alan’ yê Med Nûçe bî û hayr ant rojdemê sîyasî yê Tirkîye ser. Xozad sernî de hayr ant şîyayişê heyetê CPT ê Îmrali ser û şîyayişê heyetî zey gameke muhîm dî. Xozad va, vengê Rayverê ma biriyayo û qiseyê xo hina dewam kerd: “Rayverê ma bi zilmê girdî ra rî bi rî yo. No tecrîd bi xo, qirkerdişekê tewr gird o. Nayî ra, ziyaretê CPT mihîm o. Helbet CPT bi xo nêşî. Netîceyê nûmayiş û xoverdayişê şarê ma de şî Îmrali. Ez no xoverdayişî selamî kena. Lazimo no xoverdayiş gird bibo.” Xozad CPT ra waşt ke wextekê kilmek de, netîceyê ziyaretê xo eşkere bikiro.

Besê Xozad derheqê rewşê siyasî yê Tirkiye ser zî qisey kerd û wina vat: “Bi xoverdayişê Kurdistan û quwetanê demokrasî, krîzê miyanê AKP bi gird. Quwetê esasî ke dûştê AKP xover dano, tekoşînê azadî û demokrasî beno ravey, quwetê kurdan o. Nika quweto ke Tirkîye îdare keno, daîreyê lejê taybet o. Erdogan zî serokê na daîre yo. No quwet AKP zî xeftineno. Çike AKP bi îstismarkerdişê dînî, şarî miyan de lejê psîkolojîk ramena.”


Erdogan wazeno bibo Ataturk’ê diyîn

Hemseroka Konseya Rayverîn ê KCK Besê Xozad hayr ant hewldayenê sîstemê dîktatoryal yê AKP û Erdoganî ser û hina va: “AKP û Erdogan hewl danê ke Tirkîye de dîktatorînê faşîst ronê. Serva na waşten bi Cemaatê Gulen’î ra îtîfaq kerdbî. Badê vilabîyayinê îtîfaqî, AKP na qorî zî, bi dewleta xorîn îtîfaq viraşt. Erdogan bi sîstemê serokînî wazeno bibo Ataturk’ê diyîn û dîktatorînê xo rono.

Xozad qiseyanê xo de hayr ant wezîfera girewtişê Serokwezîrê Tirkîye Davutoglu ser û hina vat: “Meseleya kurd û demokrasî de, mavênê zîhniyetê Davûtoglû û siyasetê Erdogan’î de qe ferq çinî yo. Davutoglu zerî ra nezdîyê sîstemê serokîn nêbi û bi aktîf propagandayê sîstemê serokîn nêkerdê. Cok ra zî Erdogan'î ey tesfîye kerd.


Wazeno HDP meclîs ra çekerê

Hemseroka Konseya Rayverîn ê KCK meseleya wedarnayişê (hewadayişê) heqê destnêdayişê parlementeranê HDP zey hewldayenê AKP ê serva tesfîyekerdişê HDP û demokrasî hesibna û heme quwetanê demokrasî ra waşt ke, vera êrişan û faşîzmê AKP, vengê xo berz bikirê.

Hozat serva demê nikayî ra tepîya ser de vat ke, înan zey hereket kombiyayişê muhîmî viraştê û qerarê tarîxî girotê. Xozad ard ziwan ke, dûştê rejîmê faşîst ê netew-dewlet ê dê xoverdayişê xorayverînê demokratîk pêrokîn leteyanê Kurdistan û Tirkiye de berz bikerê.  Xozad planê AKP ê derheqê Mereş’î  zey hewldayenê qedînayişê alewîyan hesibna û hayr ant  tekoşînê ser. 


 NAVENDÊ XEBERAN