Çalakîya grevê vêşanîye ke seba wedarnayîşê tecrîdî dewam kena, resaya merhaleyêka krîtîke. Çalakwanan ra Yasîn Gungorî dîyar kerd ke ê seba ameyoxêko hempar xoverdayîşê xo domnenî. Hemserekê HDPyî yê Êlihî Nîzamettîn Toguço ke tewqîfkerde yo, dayo zanayene ke heta tecrîd nêwedarîyo, o nêşono mehkemeyan.
Vera tecrîdê ser Rayberê Şarê Kurdî Abdullah Ocalanî de çalakîyê grevê vêşanîye dewam kenî. Çalakîya Hemsereka KCD û Parlamenteran HDPyî Leyla Guvene roja 180. de, çalakîya Nasir Yagizî roja 167, çalakîya Îmam Şîş û 14 çalakwananê Strasbourgî roja 141, ya Fadîle Toke 107, çalakîya Yusuf Îbayî zî roja 115. de dewam kena.
Çalakîya grevê vêşanîye ke zîndananê Kurdîstan û Tirkîya de dewam kenî zî roja 142. de ya. Hepsîyan ra 15ê ci çalakîya xo açarnaya rojeyê mergî. Hepsîyan ra yew zî Yasîn Gungoro ke Zîndanê Xarpêtî de maneno yo. Gungoro ke 43 kîlo mendo, bi mektûbêk seba piştîdayîşî veng da.
Gungorî mektûbe de dîyar kerdo ke nê erdî qetlîyaman reyde yenî şinasekerdene û wina vato: “Tecrîdo ke Zîndanê Îmrali de dewam keno, raştîya xo de şexsê Ocalanî de heme kurdan rê beno. Ganî Ocalan sey şexsêko normal nêro dîyayene. Nizdîbîyayîşê dewlete yê Ocalanî beno sebebê mergan. Vera terso ke îqtîdar wazeno awan bikero de zîndanî yewna rey xover danî û seba demokrasî û edaletî bîyî şewq. Ma do qet waştişê azadîye ra fek veranêdî.”
Gungorî dayo zanayene ke grevê vêşanîye êdî merhaleya krîtîke derbaz kerdo û wina vato: “Ganî herkes bizano ke bêvengîye yena manaya ortaxîya sucî. Cok ra wa herkes wayîrê çalakîyan bivejîyo. Çîyê ke yenî waştiş, çîyê ke nêrî qebulkerdiş nîyî. Waştişê ma o yo ke wa dewlete qanûn û huqûqê xo bierzo dewre yo. Heta ke tecrîd nêwedarîyo, ma do çalakîya xo bidomnî. Ma merhaleyêka krîtîke de veng danî herkesî ke wa bibî vengê ma. Xoverdayîşê ma seba ameyoxêkê hemparî yo. Her roje bedene ma helîyeno labelê ez hêvî kena ke no helîyayîş do bibo sebeb ke hêvîyê ma gird bibî.”
Heta ke tecrîd nêwedarîyo, ez nîna mehkemeyan
Nîzamettîn Toguç wextê Partîya Demokrasî de parlamenterî kerdbî, mecbûr mendbi ke welatê xo biterikno. Toguç 21 serrî ra dima agêrabi welat û 10ê teşrîna verêne de wexto ke Hemserekîya HDPyî yê bajarê Êlihî kerdêne, amebi tewqîfkerdene. 3 rojî verê mehkemeya Toguçî estbî, labelê Toguç beşdarê mehkeme nêbi. Ame musayene ke Toguçî waştişnameyêk dayo îdareyê zîndanî û waştişname de dîyar kerdo ke heta ke Rayberê Şarê Kurdî Abdullah Ocalanî ser o tecrîd nêro wedarnayene, o do beşdarê mehkemeyan nêbo. Toguçî waştişnameyê xo de qala 7 madeyan kerdo û wina rêz kerdo: “Wa Birêz Ocalan keye, avûkat û hepsîyanê bînan reyde pêvînayîşan bikero, gere doktorê xoserî Ocalanî kontrolêko hîra ra derbaz bikerî, wa radyo, rojname, kovare û kitabî bidîyî, wa Ocalan bişînbo keyeyê xo reyde telefon de qisey bikero û seba çareserîyêka demokratîke wa vernîya ci bêro akerdene.”
AMED