Çeteyanê DAIŞî tebaxa 2014î de hêrişê Şengalî kerdbî û cinî, doman, extîyar xeylê kesan qetil kerdbîy û bi hezaran kesan zî remnaybî. O wext eke komekê gerîlayê HPGyî nêresayênê hawara şengalijan, çeteyan do qetlîyamêko gird bikerdêne. Babete ser o gerîlayê ke o wext şîybî hawara şengalijan ra Ahmet Bagokî qisey kerd.
Bagokî va grûba sifteyîne ameyî Newala Şilo û wina dewam kerd: “Na newale de 365 şikefteyî estî û cayêko nimite yo. Şaro ke fermanî ra rema, ewil xo eştbî tîya. Ewil embaz Canpolat û Kahraman ameybî tîya. No proses de çeteyan hêriş kerd û embazan xoverdayîşêko gird nîşan da.
Keda Şehîd Çekoyî
Bagokî dewamê qiseykerdişê xo de Çeko Çatak ke xoverdayîşê Şengalî de ca girewt û dima ra Hezex de şehîd kewt vîr ard û wina domna: “Kedêka girde ya Şehîd Çekoyî Xoverdayîşê Şengalî de estbî. Seba ke korîdorê mabênê Rojawan û Şengalî de amebî girewtiş, ma zaf zehmetî antî. Rojêk çeteyan bi wesayîtanê zirxinan hêrişê Girê Kunî kerdî. Ewja de 10 çeteyî ameyî kiştiş û 6 çeteyî zî birîndar bîybî.”
Xoverdayîşê girî de embaz Kendal yeno vîr
Newala Şilo nîmeyê Koyê Şengalî yo; cok ra çeteyê DAIŞî tim hêrişê tîya kerdênê. Seba ke zanayênê ke cephaneyê înan kêmî yo, çeteyan hêrişê Solak û Newala Şilo kerdênê. Bagokî wina va: “Badê ke dewa Barê destê çeteyan ra ameye girewtiş, cephaneyêko gird kewt destê embazan. Embazan bi no hawa çalakî viraşt û gir çeteyan ra girewt. Girewtişê nê girî de keda Şehîd Kendalî gird bî. Embaz Kendal zî dima ra Nisêbîn de şehîd kewt.”
ANF/ŞENGAL