Destê hergû polîsî de çekê giranî estbî. Hergû polîsi dir êleko gule tira nêvîyareno dawo xora. Bi desan wesayîdê nameyê yîne Kirpî û tanqî. Merdim bawer nêkeno na qezaya Sûrî ya, na dewlet a. Erdnîgarîya Komarê Tirkîyaye sero ya. Ti vanê na dewêlêka bîn a. Ende polîs bi ende wesayît û çekê şerî duşt dewêlan yeno şuxilnayîş. Merdim nêşkeno duştê hemwelatiyê xo nê hukmî bikero. Karê aqilî nîyo. Tene ê aqilî nê, tu wijdan, tu merdimahî naye qebûl nêkeno. Kene qîrî tu kesek do nêkewo kolanan û kuçan. Yew dukan nêbo a. Na ca û war de bi hezaran merdim cuyeno. Malbatî cuyenê. Nê malbatan de heme emir de merdimî estê. Bajaran de cuyayîş rojane wo. Dew nîya. Dewan de, ti tedarekê çend rocan kenê. Nan û zexîreyê to zere de yo. Bajaran de ewna niyo. Ban esto wer kê xo de nêpewceno. Aşxanan ra wazeno. Roj di ray şinê firine ra nano germin anê keyeyê xo. La çi heyf ke şeveqê serê sibaye, nimajê serê sibaye ra hetêk ra sewtê helîkopteran, hetêk ra sewtê tanq û Kîrpîyan. Hetêk ra sewtê vengê polîsan; “Teber meku”. Engîşta pêro polîsan tetika çeko giranî sero ya. Sewtêko qickek bêro. Hema lez û bez pêro tey dir engîşta xo tetike ro şedênenê sewtê gulan heme hetê Sûrî ra berz yeno. Tenê zereya Sûrî de nê, çiqas rayêko şinê zereya Sûrî pêro bi şerto asinîn dorpêç kerdo. Pêro rayî kuçey bi ê şertê asinînan giroto. Pey yê şertê asinînan de bi seyan polîs vinderte yî. Tenê polîs nê, TOMA awe ra dekerde yî. Awe zereya ê TOMAyan de dekerde ya. Zereya awa TOMAye de enway cure derman û boyax tede yê. Gama bena merdimî ro canê merdimî socyeno. Amûrê eştişê bombê gazî. Gama ê bombê xazî yenê eştiş ke merdimî ro guna, merdim beno birîndar. Zehf merdimî pê amey kiştişî zî. Bi dumanê yîne çimê merdimî socyenê. Merdim vernîya xo nêvîneno. Hêsrê çimanî yenê war. Nefesê merdimî çikyeno. Zincîya merdimî awin bena. A game derman kuno dewre. Derman zî şekerê çaye, yan zî lîmon o. Gama awa şid û bombeya xazî yena eştiş merdimê ke ê derdorîyê her yew hetêka vazdenî. Tay nêşkenê vazdê, cayê xo de nişenê ro. Nêşkenê game berzê. Cawo binê tesîrê bombeya xazî de manen, ewca beno veng kes nêmaneno. Na rey cayêko bîn de resenê pêy. Dûrişman erzenê. Rayîr birnenê. Di seetî bade coy temamê Amedî de çalakî virazyenê. Heto bîn ra zî diyalox bi walî dir ronenî. Roja diyin seat panc de temamê şertê asinînan hetê polîsan ra dayenê arê. Dorpêçkerdişê Sûrî qedyeno. Zereya Sûrî ra sewtê “Xoverdayîş cuyayîş o” beno berz.
Nesîp GULTEKÎN