Xoverdayîşî plananê Erdoganê veng vet

Netîceyê hêrişê dagîrkerîye yê artêşa Tirk û çeteyanê ci de bi seyan sivîlî ameyî qetilkerdene û hendêna zî birîndar bîyî. Reyna hêrişan de sîyasetmedara cinîye Hevrîn Xelefe ameybî qetilkerdene û Çîçek Kobanê zî hetê çeteyan ra tepişîyaybî.

Sereka Buroyê Têkilîyanê Teberî yê Partîya Ameyoxî ya Sûrîye Celaa Hemzawî derheqê hêrişan de qisey kerde û dîyar kerde ke ganî hesabê nê qetlîyam û esîrgirewtişan bêro perskerdene. Hemzawî da zanayene ke amancê nê hêrişan ganîkerdişê DAÎŞî yo û wina va: “Qetilbîyayîşê Hevrîn Xelefe û îşkenceyo ke cenazeya aye ser o ameyo kerdene nîşan dano ke herême de zîhnîyetê DAÎŞî esto.”

Hemzawî qiseykerdişê xo de peymana ke mabênê Tirkîya û Rûsya de bajarê Soçî de ameybî kerdene ser o qisey kerde û wina va: “Seke qala ewleyîya sînorî yena kerdene, amanc o nîyo. Amancê na peymane no yo ke hêzanê QSDyî sînor ra durî bikerî û Îdareyê Xoserî yo Demokratîke zehîf bikerî. Amancê Tirkîya yê derheqê Vakur û Rojhelatê Sûrîye de zaf hîra yo. Labelê xoverdayîşê QSDyî heme plananê Erdoganî veng vet. Xora çeteyê ke destek danî Erdoganî, raştîya xo de pey pereyî de şonî. Derdê înan çareserîya problemanê Sûrîye nîyo. Tena amancê înan rijnayîşê gonîye yo û nêyî bi pereyî kenî.”

Ganî hesabê înan bipersîyo

Hemzawî peynîya qiseykerdişê xo de veng da komelî û wina va: “Ganî hesabê sîyasetmedara cinîye Hevrîn Xelefe ke hetê çeteyan ra ameybî qetilkerdene, bêro persayene. Reyna ganî ma hesabê esîrgirîyayîşê şerwana YPJyî Çîçek Kobanê zî bipersî.”