Edîtora Rojnameyê Xwebûnî Alkan vat ke ser ziwanê Kurdî asîmîlasyonêk esto, rojnameyê înan nika xitabê heme hetê Kurdan keno, tena xitabê îdeolojîyêk nêkeno û ziwanê Kurdî, şarê Kurdî ra danî hesdayişî.
LÊL AMED / AMED
Tirkîya de Hedîseyê 15’ê Temmuze ra pey bi OHALî îqtîdarê AKP û MHPî taybetî sazî, rojname û şaredarîyê kurd hedef girewtê. Rojnameyê Azadiya Welatî ke Tirkîya de tena bi zaravayê Kurdî, Kurmancî û Zazakî weşan kerdinî ame girewtiş. Şarê Kurd Azadiya Welat sey dibistanêk dîynê, hepsîyê sîyasî zî hepisxaneyan de bi nuşteyê xo averşîyayişê ziwanê Kurdî ra xizmet kerdinê.
Sazîyî ke seba ziwanê kurdî xebat kenî têkoşînî ra fek veranêdayê û yew bi yew yenî akerdiş. Rojnameyê Xwebûnî zî seba averberdişê zaravayê ziwanê Kurdî dest pê weşanê xo kerd. Pêroyina Tirkîya de Kurdî ke cuyenî rojname ra resayiş rê têkoşîn danê, rojname hem wanenî û hem zî danî wendişê. Rojname taybetî rasteyê ziwan û kultirê Kurdî ser o hefteyin weşan keno. 21ê Sibata Roja Ziwanê Dayîke ya Dinyaye nêzd bena, seba erjîyeya na roje rojnamegerîya Kurdî ser o Edîtora Rîpela Cenî ya Rojnameyê Xwebûnî Elîf Can Alkan qise kerd.
Taybetî vera Kurdan polîtîkayê qedexekerdişî
Edîtora Rîpela Cenî ya Rojnameyê Xwebûnî Elîf Can Alkan vat ke her kes 21ê Sibata Roja Ziwanê Dayîke ya Dinya pîroz kena la belê na roje taybetî seba şarê Kurd û şarê bindestanî ra hîna rojêka zaf bi taybet a, sereke ziwanê şarê Kurdî ameyo qedexekerdiş, no ser zî na roje hîna bi qiymetin a û wina vat: “Na roje de Kurdî taybetî qedexekerdiş û asîmîlasyonê ziwanê Kurdî ser o vindenê, ma zî sey rojname hewl danî ke bi rojnameyêko hewteyin, pêroyina Kurdistanê Vakûrî û Tirkîya de teda û zilmî ke ser ziwanan estî, no asîmîlasyonêko mîyanê şarê Kurd de taybetî ameyo meşnayiş bi hesdayişê ziwanê Kurdî do çareser bivînê.”
Ma do bibê bendêkî
Edîtora Rîpela Cenî ya Rojnameyê Xwebûnî Alkan aşkera kerd ke rojnameyê Xwebûnî taybetî ser ziwan û kultirê Kurdî weşan keno û wina domna: “Ma do bi vilakerdişê rojnameyî vera asîmîlasyonî bibê bendêkî. Rojnameyê ma de sîyasetê rojane zaf bi kêm ca gêno. Rasteyê kultir, ziwan, edebîyat û tarîxê Kurdî ser o ma xebat kenê. Çimkî nika roja ma de tewro muhîm nasdayişê nasnameyî yo. Nasname kultir û edebîyat o, ma hetanî înan nas nêkerê, ma nêeşkenî ziwanê xo şarî ra bidî naskerdişê. Seba edebîyat, ziwan û kultirê Kurdî rê zaf bedel ameyî dayiş, no ser zî ganî ma wayîr bivejê. Çi heyfo ke çar parçeyê Kurdistan û Ewropa de zî ziwanê Kurdî ser asîmîlasyonêk esto. Ma têkoşîn bidî ke ziwanê Kurdî binê bandorê ziwanê serdestan de nêhelîyo.”
Rojnameyê verin hîna bi cîya yo
Alkan pare kerd ke rojnameyê Xwebûnî kesî ke wanenî, bi çimî ke pozîtîf nirxnenê, çimkî rojnameyê Xwebûn, rojnameyê verin ra hîna cîya yo û wina dewam kerd: “Şar wazeno kultir, edebîyat û tarîxê xo bizano, no ser zî rojnameyê ma ra elaqeyêko weş nîşan danê. Wendoxan şîroveyê xo yê bi pozîtîfî taybetî ser medyaya komelî weşan kenî û ma rê ray ray mesaj erşewenî ke nuşteyê înan bêro weşankerdiş. Rojname nika xitabê heme hetê Kurdan keno, tena xitabê îdeolojîyêk nêkeno û Kurdan binê siwanêk de kom keno.”
Alkan tewro peynî ard ziwan ke rojnameyê Xwebûnî heme bajaranê Kurdistanê Vakûr û Tirkîyaye de Kurdî ke esto ra vila beno, eke waştiş bibo înan ra zî erşewenê û rojnameyî ke çap kenî heme yenî rotiş.