Nê rojan de ma hîsanê têmîyankewteyan cuyenî. Hetêkî ma de seba ameyoxe hêvîyê girdî estî, hetê ma yo bîn de dej û hîsinîyêka girde esta. Ya yewine; nê rojanê peyênan de xeberê ke derheqê weşî û ewleyîya Rayber Apoyî de vila benî şarê kurd de etirîyayîş û rewşêka tehlukeyin virazenî. Tewr zaf no halê ma yo hîsin ser de tesîr keno. Şarê ma sere de cinî û ciwanî vera nê prosesê tehlukeyinî de vejîyayî raşteyan û heta ke Rayber Apo ra xeberêk bêro girewtiş, do têkoşîn û xoverdayîş dewam bikero.
Rewşa dîyine zî; hêrişê ke hetê artêşa Iraqî û Hêzê Heşdî Şabî ra vera Başûrê Kurdistanî de yenî kerdiş î. Başûrê Kurdistanî newe ra raştê hêriş û dagîrkerî ame. Vera nê hêrişan de bêxera gerîlayê HPGyî û tayê pêşmergeyê zerrîwaştoxan, ti kesî xover nêda û bi teriknayîşî bajar teslîm kerdî. Şer de beno ke merdim heta guleyê xo yo peyên şer bikero û seba ke ge-ge hêzê merdimî qîm nêkeno yan zî sewbîna sebeban ver zorê merdimî şono. Çîyêko winasî îxtîmal esto ke heme şeran de bêro cuyayîş. Labelê çîyêko Başûrê Kurdistanî de ame cuyayîş, wina nîyo; ewja de bê xoverdayîş û bê têkoşîn xo tepîya antiş virazîya. Netîceyê nêyî de beno ke xoverdayîş û têkoşînê şarî de bêbawerîye bivirazîyo. Labelê ganî merdim tîya de dîyar bikero ke tena berpirsîyarê na rewşe pêşmerge nîyo, berpirsîyar îradeya sîyasî û hukmatê Başûrî yî.
Ewro derheqê bêpawitiş teslîmkerdişê Kerkûkî de îdîa û propogandayê cîddî estî. Seba ke berpirsîyarîya na rewşe bierzî yewbînan ser, tayê belgeyî pare kerdî. Tîya de çi raşt o an zî çi şaş o, nê çiqas seba zeyîfkerdişê yewbînan ameyî kerdiş û çîyê ke ser de munaqeşe bêrî kerdiş muhîm î. Labelê tîya de çîyo raşt o yo ke Kerkûk, Şengal, Mexmur, Germîyan, Tuzxurmato û sewbîna xeylê cayê Başûrê Kurdistanî newe ra ameyî dagîrkerdiş.
Raştîyêka bîne ya muhîme zî şarî ters û rîskê qetlîyamê DAIŞêko newe cuya. Cok ra şar mecbûr mend ke ca û warê xo biverdo û koç bikero. Tabî hetê tersî de hêrsêko gird zî şar de virazîya. Koçkerdişî ra zêdeyêr, şar qezencê xo yê ke netîceyê keda bi serran de girewtbî, vînî kerd û sebebo esasî yê nê hêrsî zî no bî. Sebebê esasî yê bermayîş û qîrayîşê şarî muhakemekerdişê na rewşe bî. Şarî vera na rewşe de îtîraz kerdêne û vatêne ‘no qetlîyam, enfal, koç û surgin yê çendin o, êdî bes o’.
Îtîraz û muhakemekerdişê şarê ma na rey, yê bînan ra cîyayêr bî. Şar vano ke bedel û berpirsîyarîya nê karî estî. Labelê heme îzehetê ke heta nika hetê temsîlkaranê sîyasî yê Başûrê Kurdistanî ra ameyî kerdiş nîşan danî ke ê hîna giranî û berpirsîyarîya rewşe fam nêkerdî. Nê îzehetî cîddîyetî ra durî yî û eksê raştîya şar û welatî yî. Ganî hesabê nê sucê tarîxî bêro dayîş. Bê xoverdayîş û bê têkoşîn teriknayîş, bêdengetîya hêzî reyde nîno îzehkerdiş. Tîya de yê ke ame vînîkerdiş tena rewşa sîyasî û ekonomîke nîyo, tarîx, komel, psîkolojî û şikîyayîşê hêvîyan o zî.
Nika çîyê ke bêrî kerdiş tena hesapperskerdiş û berpirsîyarîya sîyasî nîyî; çimkî derheqê ameyoxe de şarê ma mîyanê ters û etirîyayîşî de yo. Problemê ke hetê hîs û psîkolojîkî de yenî cuyayîş, rew bi rew çareser nêbenî. Hetê bawerîye de tesîrê nêyî komel û cuye ser de beno. Nika wextê rojevkerdişê rewşê negatîf û bêhêvîtî nîyo. Ganî ma muhakeme û hesabê na rewşe bikerî û hewl bidî na rewşe derbaz bikerî.
No zî awankerdişê yewîya neteweyî ra derbaz beno. Sebebê esasî yê nê rewşan, awannêbîyayîşê yewîya neteweyî yo. Çîyo ke ma qirkerdiş, qetlîyam, koç û surgunan ra bixelisno, yewîya neteweyî ya demokratîke ya. Ganî heta ke erey nêbîyo, heme het û dezgehê sîyasî yê eleqederî seba yewîya neteweyî ya demokratîke bixebetîyî. Çîyo ke bawerî bido şarî, qezencanê şarî bipawo û vernîya qetlîyam û hêrişanê dagîrkerîye bigîro, no yo. Seke referandûm de zî ame kerdiş, bi zêdekerdişê hîsê mîllî û menfîetê demkî yê sîyasî welat û şar nînî pawitiş. Ganî ma ewil hêzê pawitişî yê neteweyî, dîplomasî û ekonomîye awan bikerî û seba ma çîyê esasî nê yî.
Ma ancax bi averberdişê yewîya neteweyî eşkenî na rewşe orte ra wedarnî. Eke ma wina bikerî ma eşkenî hêvîya xo gird bikerî û ameyoxêka azade û demokratîke xelq bikerî. Nika dûştê îdeolojîk, sîyasî, pawitiş û komelkî ke bişînbo nînan bikero, esto. Tena wa heme hêzê sîyasîyî fek menfîetanê xo ra verabidî.